Koreya yarımadasında sərhədyanı məntəqədə cənub və şimal qonşuları arasında aparılan danışıqlar müsbət nəticə verib.

Ulusəs Oxu.Az-a istinadən xəbər verir ki, bu barədə “Washington Post” Cənubi Koreya rəsmilərinə istinadən məlumat yayıb.

Rəsmi Seul bildirib ki, Şimali Koreya gələn ay Cənubi Koreyanın Pxençan şəhərində keçiriləcək Qış Olimpiya Oyunlarına öz atletlərini göndərməyə razılaşıb.

Cənubi Koreya milli birləşmə məsələləri üzrə nazirinin müavini Çun Hayın sözlərinə görə, razılaşmaya əsasən, Pxenyanın göndərəcəyi nümayəndə heyətində atletlər, tərəfdarlar, jurnalistlərlə yanaşı (dövlət), rəsmiləri də yer alacaq.

Çun bildirib ki, Cənubi Koreya hər iki qonşunun Olimpiya Oyunlarının açılış və bağlanış mərasimində birgə yürüş keçirməyi təklif edib.

Seul danışıqlarda müharibədən sonra bir-birindən ayrı düşən ailə üzvlərinin qovuşması ilə bağlı danışıqların davam etdirilməsi məsələsini önə çəkib, təmas xəttində sabitliyin qorunması ilə bağlı danışıqları davam etdirməyi təklif edib. Danışıqların təfərrüatları barədə hələlik məlumat verilmir.