Bakı Ali Neft Məktəbinin (BANM) və Böyük Britaniyanın “TwentyEighty Strategy Execution” (STRATEX) şirkətinin birgə təşkilatçılığı ilə həyata keçirilən və ABŞ-ın Corc Vaşinqton Universitetinin magistr proqramı əsasında tədris edilən Layihə İdarəetmə Məktəbi (SPM) mütəxəssis hazırlığını uğurla davam etdirir. Ali Məktəblə birgə əməkdaşlıq çərçivəsində bu layihənin Bakıda 100-dən çox məzunu var.
Layihə İdarəetmə Məktəbinin proqram meneceri Nərmin Əhmədova bildirib ki, SPM-in məqsədi layihə menecmenti üzrə təhsil almaq istəyən, lakin xaricdə təhsil almağa zamanı və imkanı olmayanlara elə Bakıda bu sahə üzrə dərin biliklərə yiyələnməklərinə şərait yaratmaqdır.
“Bu beynəlxalq proqramı uğurla başa vuran iştirakçılar sonda Corc Vaşinqton Universitetinin magistr sertifikatını əldə edirlər. Bundan başqa, proqram üzrə tədris edilən hər bir modul (təlim) üzrə də Corc Vaşinqton Universitetinin sertifikatları təqdim edilir. Layihə İdarəetmə Məktəbinin uğurlarından biri də ondan ibarətdir ki, bu məktəbi bitirən məzunlar karyeralarında irəliləyiş, uğur əldə edirlər. Layihə İdarəetmə Məktəbi karyerada irəli getmək istəyən, iddialı mütəxəssislər üçün böyük şansdır”, -deyə N.Əhmədova əlavə edib.
Qeyd edək ki, Layihə İdarəetmə Məktəbində “Layihələrin idarə edilməsi”, “Qrafik və xərclərə nəzarət”, “Risklərin idarə edilməsi”, “Layihəyə rəhbərlik, menecment və kommunikasiya”, “Layihə rəhbərləri üçün keyfiyyət”, “Layihə idarəetməsinin tətbiqi mexanizmləri”, “PMP imtahanına hazırlıq”, “Layihə menecerləri üçün danışıq aparma bacarıqları” kimi modullar tədris edilir.
Proqramın yeni qrupu üçün artıq qeydiyyat başlayıb. Siz də şansınızı əldən verməyin və biliklərinizi təkmilləşdirməklə karyeranızda yüksəliş əldə edin!
Daha ətraflı məlumat üçün +99450 8433062 nömrəsi ilə əlaqə saxlaya bilərsiz.
“Qafqazinfo”