Lənkəran rayonu, Sütəmurdov kəndinin sakini İsayev Amid Əlhəddin oğlu evinə işıq sayğacı qoyulması üçün “Azərenerji” Açıq Səhimdar Cəmiyyəti “Şirvan Regional Elektrik Şəbəkəsi” Məhdud Məsuliyyətli Cəmiyyəti tərəfindən 11.12. 2013- cü il tarixində 019005 saylı texniki şərt verilmişdir. Həmin texniki şərtə əsasən, abonentlə Lənkəran Elektrik şəbəkəsi arasında 23.01. 2014- cü il tarixli akt tərtib edilmişdir.
Abonent dəfələrlə yazılı və şifahi müraciətlər etsə də, Lənkəran Elektrik Şəbəkəsinin Enerji Satışı üzrə rəisi Cavid Talışınski tərəfindən süni əngəllikər yaradılaraq, bu günə qədər sayğacla təmin olunmamışdır.
Vətəndaş evinə işıq sayğacı qoyulması üçün Lənkəran Elektrik Şəbəkəsi tərəfindən həmin dövr üçün mövcud olan qanunvericiliyin bütün şərtlərinə əməl etmişdir. Son dəfə noyabr ayında Cavid Talışınski abonentə bildirib ki, evə işıq sayağacı qoyulması üçün 201 manat pul ödəməlidir. Vətəndaş isə, öz növbəsində, ötən müddət ərzində evinə sayğacın qoyulmamasının səbəbini öyrənmək istəsə də, rəis əsəbi halda qışqıraraq, “Səni dinləməyə artıq vaxtım yoxdur. Əgər sayğac istəyirsən pulunu ödə. İstəmirsənsə xoş getdin” – deyib.
Bu barədə aidiyyəti qurumlara şikayət edəcəyini dedikdə isə, rəis abonentə “hara istəyirsən, şikayət elə, heç kimdən asıllığım və qorxum yoxdur” - deyib.
Bununla əlaqədar olaraq, abonent Lənkəran Elektrik Şəbəkəsinin rəisi Aydın Məmmədova və Cənub Regional Enerji Təchizatı və Satışı Şöbəsinin rəisi Əbülfəz Paşayevə müraciət etsə də, onlar da, Cavid Talışiniskinin dediklərini deyiblər.
Ölkə Prezidenti öz çıxışlarında məmurların təvazökar olmasını, hər bir dövlət məmurunun xalqın xidmətçi olmasını, hətta, özünün də xalqın xidmətçisi olduğunu dəfələrlə bildirsə də, lakin Lənkəran Elektrik Şəbəkəsində işləyən Cavid Talışnski kimi məmurlar ölkə başçısının bu tövsiyyəsini ya eşitmək istəmirlər, ya da, dərk edə edə bilmirlər.
Son illər Enerji Sərfiyyatına nəzarət edən Lənkəran Elektrik Şəbəkəsinin nəzarətçiləri vətəndaşların etibarından və səmimiyyətindən sui- istifadə edərək enerji sərfiyyatı pulunu vətəndaşlardan nağd halda yığaraq, öz maddi rifahının yaxşılaşdırılmasına sərf edərək, mənimsədikləri pulları vətəndaşlara debitor borc kimi sırıyırlar. Bu danılmazdır ki, Lənkəran Elektrik Şəbəkəsinin məmurları dövlətin qanunlarını çoxdan yaddan çıxarıb həmin şəbəkəni özləri üçün sərfəli olan və özlərinə məxsus olan qanunlar ilə idarə edirlər.
Ən çox işlətdikləri dırnaqarası qanunlarından biri budur ki, vətəndaşlara sırıdıqları debitor borcları yığmaq üçün bayram qabağı heç bir yazılı xəbərdarlıq etmədən işıq xəttlərini kəsirlər. Mövcud şəraitdə maddi durumu acınacaqlı olan vəətndaşlar bayram süfrəsi üçün qənaətlə qəpik - qəpik yığıdığı pulları məcburiyyət qarşısında qalıb debitor borcun ödənilməsindən ötrü verirlər. Təsəlliləri də bu olur ki, bayram gecəsində işıq əldə edə biliblər.
Lənkəran Elektrik şəbəkəsinin yaratdığı acınacaqlı vəziyyətin qurbanların sayı gündən - günə artır. Vətəndaşlar bu acınaqlı vəziyyət barədə Cənub Regional Enerji Təchizatı Şöbəsinin rəisi Əbülfəz Paşayevin qəbuluna düşüb üzbəüz deməyə çalışsalar da, hər dəfə daha acınacaqlı bir mənzərənin şahidi olurlar. Əbülfəz Paşayevin qəbul otağında əyləşən Fərid adlı katibi rəhbərini narahat etməmək üçün bütün vasitələrdən istifadə edərək, onların rəislə görüşməsinin qarşısını alır.
Görəsən, “Azəriişıq” Açıq Səhimdar Cəmiyətinin rəhbərliyi xalqın mənafeyini öz mənafeyinə qurban verən belə məmurlar barədə nə düşünür?
Araşdırdı: Zahid Səmədov