XIX əsrin ikinci yarısından etibarən Avropalı səyyahların Qafqaz bölgəsinə marağı daha da artmışdır. Bunun bir çox səbəbləri vardı – iqtisadi maraqlar (məsələn Bakının neft yataqları), elmi - əsasən arxeoloji və etnoqrafik maraqlar və s.
Bu səyyahlar arasında Baron de Bay adı ilə tanınan fransız Jozef Bertelo de Bay (Joseph Berthelot de Baye) da vardı. 1853-cü ildə doğulmuş Baron de Bay arxeoloq, etnoqraf və fotoqraf olmuşdur.
Gənc yaşlarından arxeologiya elmi ilə maraqlanan Baron de Bay ilk dəfə 1890-cu ildə Rusiya İmperiyasına səyahət etmiş və bundan sonra mütəmadi olaraq XIX əsrin əvvələrinə qədər Rusiyanı ziyarət etmişdir. Fransa Xalq Maarif Nazirliyinin xətti ilə burada arxeoloji qazıntılar aparmış (əvvəlcə Sibir bölgəsində, sonralar isə Qafqazda) əldə etdiyi tapıntıları Fransa göndərərək bir çox fransız muzeylərinin kolleksiyalarını zənginləşdirmişdir.
Rusiya İmperiyasının yüksək dairələrindən olan insanlarla dostlaşmış, 1896-cı ildə Çar II Nikolayın tacqoyma mərasimində iştirak etmişdir. Dostu qraf Sergey Şeremetiyevin dəvətilə 1897-ci ildə qrafın Gürcüstanın Kaxetiye bölgəsindəki malikanəsində dincəlməyə gələn Baron de Bay beləcə Qafqaz bölgəsi ilə tanış olur. Bura vurulan de Bay 1897-1904-cü illərdə demək olar ki hər il Qafqaza gəlir.
Baron de Bay bütün səyahətləri zamanı özü ilə fotoapparat götürərək yüzlərlə şəkil çəkmişdir (XIX əsrin sonunda artıq portativ fotoapparatlar inkişaf etməyə başlamışdı). Səyahətləri zamanı o həm də yerli əhali, onların adət ənənələri, tarixi ilə yaxından maraqlanır, qeydlər götürür və Parisə qayıdan zaman çoxsaylı broşura və kitabçalar dərc etdirirdi.
Baron de Bayın kolleksiyalarında Azərbaycanda çəkilmiş çoxsaylı şəkillər vardır. Şəkillərin bəziləri müəllifin 1901-ci ildə dərc olunmuş « Chez les Tatars, de Derbent à Elisabethpol » (Tatarlar. Dərbənddən Yelizavetpola) və 1902-ci ildə dərc olunmuş “Les Juifs des Montagnes et les Juifs Géorgiens » (Dağ Yəhudiləri və Gürcüstan Yəhudiləri) kitablarında istifadə olunmuşdur. Şəkillərin bəziləri ilə sizi tanış edirik.