“Formanı geyinmişdim ki, məni elə tanısın”

Xətai Rayon Polis İdarəsinə müraciət edən paytaxt sakini Tofiq Qasımov avqustun 6-da özünü hüquq-mühafizə orqanlarının polkovnik rütbəli zabiti kimi təqdim edən, əvvəldən tanıdığı Rizvan adlı şəxs tərəfindən aldadıldığını bildirib.

ARB TV xəbər verir ki, şikayətçi dələduzun ondan oğlunu universitetlərdən birinin hüquq fakultəsinə düzəldəcəyi adı ilə 11000 manat aldığını iddia edib.

Polis həyata keçirdiyi əməliyyat-axtarış tədbirləri nəticəsində dələduzluq etməkdə şübhəli bilinən şəxsi saxlayıb.

Rizvan Cəfərov – Saxlanılan şəxs: “Tofiq Qasımov xahiş etdi ki, oğlunu hüquq fakültəsinə düzəldim. 11 min aldım ki, düzəldim. Formanı da geyinmişdim ki, ədliyyə işçisi kimi məni tanısın. Ədliyyə işçisi deyiləm”.

Qeyd edilən faktla bağlı Xətai Rayon Polis İdarəsinin İstintaq Şöbəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar davam etdirilir.

Polis əməkdaşları Rizvan Cəfərovun analoji cinayətlərdə iştirakını istisna etmirlər. Onun dələduzluq və ya digər qanunsuz əməllərindən zərərçəkən başqa şəxslər varsa, bu barədə Daxili İşlər Nazirliyinin “102” xidməti-zəng mərkəzinə və ya Xətai Rayon Polis İdarəsinə məlumat verə bilərlər.