Azərbaycan nümayəndə heyəti torpaqların konsolidasiyası ilə bağlı Türkiyənin təcrübəsini öyrənir.

“Torpaqların Konsolidasiyası üzrə Milli Strategiyanın və Torpaqların Konsolidasiyası üzrə Pilot Layihənin hazırlanmasına dəstək” layihəsi çərçivəsində BMT-nin Ərzaq və Kənd Təsərrüfatı Təşkilatının (FAO), Azərbaycanın Kənd Təsərrüfatı Nazirliyinin nümayəndələri və Salyanın Şorsulu kəndinin fermerləri Türkiyənin Dənizli şəhərində səfərdədir.

Səfərin ilk günü – dekabrın 4-də Dənizli şəhərində Azərbaycan nümayəndə heyəti və Türkiyənin bu sahə ilə bağlı qurum rəhbərləri, dövlət nümayəndələri arasında görüş keçirilib.

Görüş zamanı FAO-nun beynəlxalq layihə rəhbəri Amin İsmayılov bildirib ki, Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”nin Tədbirlər Planına uyğun olaraq, Salyan rayonu Kənd Təsərrüfatı Nazirliyinin təşəbbüsü, həmçinin FAO ilə Texniki Əməkdaşlıq Proqramı çərçivəsində həyata keçirilən “Torpaqların Konsolidasiyası üzrə Milli Strategiyanın və Torpaqların Konsolidasiyası üzrə Pilot Layihənin hazırlanmasına dəstək” layihəsi üzrə pilot ərazi seçilib. Pilot layihə çərçivəsində Şorsulu kəndinin fermerləri ilə seminarlar təşkil edilib, torpaqların konsolidasiyası mövzusunda məlumatlandırılıblar.

A.İsmayılov pilot layihə ilə bağlı təqdimatla çıxış edərək Şorsulu kəndi barədə məlumat verib.

Sonra Türkiyə tərəfinin təqdimatı dinlənilib. Təqdimat torpaqların konsolidasiyasının fermerlərə faydaları mövzusunda olub və fermerləri maraqlandıran suallar cavablandırılıb.

Qeyd edək ki, dördgünlük səfər zamanı torpaqların konsolidasiyasının tətbiq edildiyi ərazilərə baxış keçiriləcək. Həmçinin yerli dövlət nümayəndələri və hər iki ölkənin fermerləri arasında görüşlər də planlaşdırılıb.