ABŞ ixrac məhdudiyyətli tədbirlərini genişləndirərək Rusiya ilə bağlı 93 şirkətə sanksiya tətbiq edib.

Bu barədə ABŞ-nin Ticarət Nazirliyindən bildirilib.

Məlumata görə, nazirlik Rusiyanın 63, Türkiyənin 16, Çinin səkkiz, Qırğız Respublikasının isə iki şirkətinə sanksiya tətbiq edib.

Qeyd olunub ki, siyahıya xarici ticarət, elektronika, sənaye avadanlıqlarının tədarükü, turizm sahələrində fəaliyyət göstərən şirkətlər daxil edilib.

Habelə, Rusiyada müxtəlif vəzifələr tutan onlarla şəxsə qarşı da sanksiyalar tətbiq olunub.

Bütövlükdə, Dövlət Departamenti xəttilə tətbiq edilən yeni sanksiyalar da nəzərə alınarsa, ABŞ-nin budəfəki anti-Rusiya məhdudiyyətlərinin hədəfləri 500-dən çoxdur.

Mənbə: TASS

13:28

ABŞ Rusiyaya qarşı yeni sanksiyalar tətbiq edəcək.

Bu barədə ABŞ maliyyə nazirinin müavini Uolli Adeyemo “Reuters” agentliyinə müsahibəsində məlumat verib.

“ABŞ Rusiyanın Ukraynaya təcavüzünün ikinci ildönümü ilə əlaqədar 500-dən çox fiziki və hüquqi şəxsə qarşı sanksiyalar tətbiq edəcək”, - deyə Uolli Adeyemo bildirib.

Adeyemo qeyd edib ki, digər ölkələrlə tərəfdaşlıq əsasında həyata keçirilən bu tədbirlər Rusiyanın hərbi-sənaye kompleksini və Rusiyanın ehtiyac duyduğu mallara çıxışını asanlaşdıran üçüncü ölkələrdəki şirkətləri hədəf alacaq.

“Çünki Vaşinqton Moskvanı müharibəyə və müxalifət lideri Aleksey Navalnının ölümünə görə məsuliyyətə cəlb etməyə çalışır”, - deyə vurğulayıb.

“Biz burada, təkcə ABŞ-də yüzlərlə sanksiya barədə elan edəcəyik, lakin unutmaq lazım deyil ki, bu tədbirlər təkcə ABŞ tərəfindən tətbiq edilmir”, - deyə Adeyemo əlavə edib.

Mənbə: Qolos Ameriki