İzmirin Bornova rayonunda yerləşən peşə təhsili mərkəzində müəllimin şagirdlərlə bağlı etdiyi hərəkət ölkədə rezonans yaradıb.

“Qafqazinfo” xəbər verir ki, türk dili və ədəbiyyatı müəllimi D.T. 16 yaşlı 6 qız şagirdini dərs saatlarında məktəbdən çıxararaq şəxsi avtomobili ilə öz evinə aparıb.

İddiaya görə, müəllim şagirdləri yeni mənzilində təmizlik işlərinə, əşyaların qablaşdırılmasına və daşınmasına məcbur edib. Həmçinin, şagirdlərin iş əsnasında yemək və yolpulu ilə təmin edilmədiyi bildirilir. Valideynlərin şikayəti əsasında təqdim edilən sübutlarda uşaqların işlədildiyi mühitdə spirtli içki və siqaret qalıqlarının olduğu da öz əksini tapıb.

Qeyd edək ki, İzmir Vilayət Milli Təhsil Müdirliyi müəllim barəsində Uşaqların Müdafiəsi Qanununu pozduğu üçün dərhal inzibati araşdırmaya başlayıb.