Əfqanıstan və Pakistan arasındakı gərginlik Durand xətti boyunca genişmiqyaslı silahlı qarşıdurmaya çevrilib.

“Qafqazinfo” Əfqanıstanın “Tolo News” telekanalına istinadən xəbər verir ki, iki ölkənin hərbi birləşmələri sərhədin altı fərqli nöqtəsində bir-birinə ağır silahlardan atəş açıblar.

Bildirilib ki, döyüşlərin əsasən Kabulun rəsmi dövlət sərhədi kimi tanımadığı Durand xətti boyunca getdiyi bildirilir.

Qeyd edək ki, sözügedən hərbi eskalasiyaya səbəb Pakistan tərəfinin fevralın 22-də Əfqanıstan ərazisindəki “Tehrik-e-Taliban Pakistan” (TTP) və İŞİD-in “Vilayət Xorasan” qoluna məxsus olduğu iddia edilən sığınacaqlara hava zərbələri endirməsidir. İslamabad bu addımı fevralın 6-da paytaxtda yerləşən şiə məscidində 31 nəfərin ölümü ilə nəticələnən terror aktına cavab kimi qiymətləndirib.

Xatırladaq ki, Pakistan hakimiyyəti bir müddət əvvəl Əfqanıstanı “açıq müharibə” ilə hədələmişdi.

***

“Geo News” telekanalının məlumatına görə, Pakistan Silahlı Qüvvələrinin keçirdiyi “Qəzəb-lil-haqq” cavab əməliyyatı nəticəsində “Taliban”ın azı 30 döyüşçüsü məhv edilib.

***

Pakistan hökumətinin açıqlamasına görə, sərhəddə baş verən toqquşmalarda ən azı 72 Əfqanıstan hərbçisi həlak olub, 120-dən çox hərbçi isə yaralanıb.

Hökumətin sözçüsü Müşərrəf Zeydi bildirib ki, cümə günü yerli vaxtla saat 02:00-a olan vəziyyətə əsasən, Pakistan ordusu Əfqanıstanın 16 sərhəd postunu məhv edib və əlavə olaraq yeddi postu nəzarət altına alıb.

Qeyd olunub ki, tanklar, artilleriya qurğuları və zirehli personal daşıyıcıları daxil olmaqla, Əfqanıstanın 36 ədəd hərbi texnikasına ciddi ziyan dəyib.

***

Pakistanın informasiya naziri Attaulla Tarar bildirib ki, “Qəzb-ül-Haq” əməliyyatı çərçivəsində “Taliban”a ciddi hərbi zərbələr endirilib.

Nazirin sözlərinə görə, əməliyyat zamanı Əfqanıstan “Taliban”ının 133 döyüşçüsü öldürülüb, 200-dən çoxu yaralanıb. Zərbə, əsasən, Kabil, Paktiya və Qəndəhar bölgələrindəki müdafiə obyektlərinə endirilib və əlavə itkilər ehtimal olunur.

Tarar qeyd edib ki, “Taliban”ın 27 postu məhv edilib, 9 post Pakistan qüvvələrinin nəzarətinə keçib.

Həmçinin, iki korpus qərargahı, üç briqada qərargahı, iki sursat anbarı, bir logistika bazası, üç batalyon və iki sektor qərargahı məhv edilib. Talibanın 80-dən çox tankı, artilleriya qurğusu və zirehli personal daşıyıcısı da sıradan çıxarılıb.

Nazir əməliyyatın davam etdiyini və Pakistanın effektiv əks-hücumlarının hələ də davam etdiyini vurğulayıb.