İyulun 27-də Konstitusiya Məhkəməsi Milli Məclisin buraxılması ilə bağlı müraciətə baxacaq. Artıq ölkədə seçki əhal-ruhiyyəsi hiss edilir, ictimai-siyasi proseslərdə iştirak edənlərin bəziləri parlament seçkilərində namizədliyini irəli sürəcəyini açıqlayıb.

Sosial şəbəkələrdə isə bu seçkidə vaxtı ilə vəzifədə olan nazirlərin, komitə sədrlərinin, eləcə də sabiq deputatların yenidən namizəd olacağı ilə bağlı məlumatlar yayılır. Hətta onların arasında sabiq təhsil naziri Misir Mərdanovun da adı çəkilir. Məlumatda onun adının YAP-ın siyahısında olacağı vurğulanır. Sual olunur, zamanında "vurulan” şəxslər yenidən parlamentə düşə bilərmi?



Siyasi şərhçi Qulamhüseyn Əlibəyli Qaynarinfo-ya açıqlamasında bildirib ki, bu adamların parlamentdə təmsil olunacağını güman etmir:

"Əvvəllər belə hallar müşahidə edilib, vaxtilə icra hakimiyyəti orqanlarında və müxtəlif vəzifələrdə çalışan şəxslər deputat seçilib. Hətta bu adamlara yenidən başqa qurumlarda vəzifələr də verilib. Amma indi hesab edirəm ki, artıq bu kimi hallara son qoyulub. Buna baxmayaraq, prinsip etibarı ilə hər şey mümkündür. Lakin gözləmirəm ki, "vurulan” kadrların hamısı namizədliyini irəli sürsün”.

Bahar Rüstəmli