Polis özbaşınalığı dövlətçilik prinsiplərinə, dövlətə xidmət məsuliyyətinə ziddir. Azərbaycan Respublikasının "Polis haqqında" Qanununa əsasən, polis Azərbaycan Respublikasının icra hakimiyyətinə mənsub olan vahid mərkəzləşdirilmiş, hüquq-mühafizə orqanıdır. Burdan da aydın olur ki, polis vətəndaşı qorumaq kimi ali missiya ilə vəzifələndirib. Daha işi vətəndaşı şərləmək, ləkələmək və vəzifəsindən sui istifadə edib dövlətçiliyin imicinə zərbə vurmaq deyil.
"Polis haqqında" Qanunun 8-ci maddəsinə əsasən, qanunla səlahiyyət verilmiş şəxslərdən başqa, hər hansı şəxsin istənilən səbəbdən polisin qanuni fəaliyyətinə məhdudiyyət qoyması, təsir və müdaxilə etməsi yolverilməzdir və Azərbaycan Respublikasının qanunvericiliyinə müvafiq qaydada məsuliyyətə səbəb olur, 9-cu maddəyə əsasən isə, polis xidmətlərinin yaradılması, yenidən qurulması və ləğvi, polisin fəaliyyətinə rəhbərlik, polis orqanlarında vəzifəyə təyin və vəzifədən azad etmə Azərbaycan Respublikasının müvafiq icra hakimiyyəti orqanının müəyyənləşdirdiyi qaydada həyata keçirilir.
Biz qarşılaşacağımız, xoşagəlməz hallardan, özbaşnalıqlardan polisə sığınmalı, ondan kömək istəməliyik. Ancaq polisi görəndə əksinə yolumuzu dəyişib ehtiyyat edirik. Bu gün polis şöbələrində özbaşnalıq, süründürməçilik, vəzifədən sui istifadə, vətəndaşla kobud davranma və təzyiq mövcuddur. Ora hər hansı şikayət və müraciət edən vətəndaş çox nadir halda razı geri dönür. Çox vaxt incidilmiş halda geri dönüşlər daha çox yaşanan haldır. Polis qadına əl qaldırmaz dedik. Əksinə Gədəbəydə problemdən şikayət edən yaşlı analara elə polislər əl qaldırdı. Azad və peşəkar fəaliyyətini yerinə yetirən jurnalistləri, ictimai fəalları elə polislərin əli ilə şərləyib həbs etdilər. Ancaq bizim güvənmək, inanmaq istədiyimiz polis ali dövlətçilik maraqlarına xidmət etməlidir. Polis orqanlarında ali savadlı ixtisaslı kadrlarla yanaşı, min bir vasitə və rüşvətlə işə alınan zorakı ruhlu polislər də az deyil. Məhz ən çox dövlətçilik ənənələrinə, cəmiyyətə zərbə vuran da sonunculardır. Onlar zorakılıq yolu ilə hər cür haqsızlıqla, kobud davranışla mənfəət, status, kreslo əldə edəcək deyə özlərini "sübut" etməyə çalışır. Bu sübut deyil, bu sadəcə rəzalətdir.
Hər hansı şikayət və özbaşnalıqlardan şikayət etmək polisə, dövlətə qarşı çıxmaq deyil. Əksinə illərdir bu missiyanı yerinə yetirən müstəqil jurnalistləri "düşmən" elan edib həbs edirlər. Bu dövləti təmizləmək deyil, bu dövlətə polidəli sağalmaz şillə çəkmək, ömürlük ləkə vurmaqdır.
Azərbaycan Respublikasının polis orqanlarının xarici ölkələrin polis orqanları və beynəlxalq polis təşkilatları ilə əməkdaşlığı Azərbaycan Respublikasının tərəfdar çıxdığı beynəlxalq müqavilələr, xarici ölkələrin polis orqanları ilə Azərbaycan Respublikasının müvafiq icra hakimiyyəti orqanın bağladığı müqavilələr, habelə Azərbaycan Respublikasının üzv olduğu beynəlxalq polis təşkilatlarının nizamnamələri və əsasnamələri ilə tənzimlənir. Bu o deməkdir ki, gərək ki, normalara, idarəçilik qaydalarına nəzarət edilsin. Polisə polisdir deyib hər cür rəftarına yaşıl işıq yandırılmasına, özbaşınalığına göz yumulmasın.
Azərbaycan Respublikasının Prezidenti İlham Əliyev Azərbaycan polisi haqqında demişdir:
"Azərbaycan xalqı Azərbaycan polisini sevməlidir, ona hörmət etməlidir. Bu gün bu hörmət var və mən istəyirəm ki, daha da çox olsun. Bunu etmək üçün gərək siz yaxşı işləyəsiniz, öz gündəlik fəaliyyətinizdə yaxşı nəticələr göstərəsiniz, cinayətkarlara qarşı daha da amansız mübarizə aparasınız. Mən bu sahədəki fəaliyyətdən razıyam. Demək olar ki, Azərbaycanda uzun illər ərzində nə cinayətkar dəstə problem yarada bilər, nə də ki, başqa qeyri-qanuni birləşmələr mövcud deyildir. Arzu edirəm ki, bundan sonra da doğma Vətənimizə ləyaqətlə xidmət edəsiniz, Azərbaycanın müstəqilliyinin möhkəmlənməsi işində iştirak edəsiniz. Azərbaycanda bu gözəl vəziyyəti daha da möhkəmləndirmək üçün, bu gözəl ab-havanı əbədi etmək üçün əlinizdən gələni edəsiniz. Siz bu vəzifəni ləyaqətlə icra edirsiniz."
Bəli, ölkə prezidenti polisə deyir ki, işinlə, ləyaqətli xidmətinlə xalqın sevgisini qazan, daha nifrətini yox. Ölkənin və vətəndaşın müstəqil, azad və suveren yaşayışı polislərin ayıq-sayıqlığı, ləyaqətli xidməti ilə olmalıdır. Ancaq biz bunun əksini görür, polisi özünüzə real təhlükə sayırıq.
Əgər bu təhlükənin qarşısı vaxtında alınmazsa zamanla dövlət imici kobud formada zədələnib, yaxşı nəticə verməz.
Odur ki, Azərbaycan polisi andına sadiq olmalı, başlıca vəzifəsinin xalqına, vətəndaşına xidmət etməli olduğunu unutmamalıdır. Daha vəzifəli məmurlar kimi davranıb kobud nümunələrlə yadda qalmalı deyil.
Rəsafil Bayramov
ATATV. AZ xəbər saytının və İctimai Xəbər Agentliyinin rəhbəri