"Fransadakı proseslər son nəticədə Makron dünyagörüşü və aqressiyasının sonunu gətirəcək".

Bunu Qaynarinfo-ya açıqlamasında Milli Məclisin deputatı Hikmət Babaoğlu Fransada hökumətin istefaya göndərilməsini şərh edərkən deyib.

Hikmət Babaoğlu bildirib ki, Fransada baş verən hadisələr Makron siyasətinin nəticəsidir:

"Çünki seçkilərin keçirilməsi, yeni hökumətin seçilməsi də Fransadakı iqtisadi-siyasi böhranı aradan qaldıra bilmədi. Artıq fransız seçicisi də başa düşür ki, bu müvəfəqiyyətsizliyin səbəbkarı Makronun siyasətidir. Makron aqressiyası sayəsində Fransa tədricən dünyadan təcrid olundu. Digər tərəfdən, Parisin neokolonialist siyasəti ifşa olundu. Sakit Okean adaları və Mərkəzi Afrikada Fransanın mövqelərinə ciddi zərbələr dəydi. Nəticə etibarı ilə bu proses həm də Fransanın iqtisadi münasibətlərinə təsir etdi".



Deputatın fikrincə, Makronun aqressiv siyasəti ölkədə müxtəlif siyasi baxışlı qüvvələrin mövqelərinin daha da radikallaşmasına gətirib çıxarıb:

"Artıq hədəf düzgün müəyyənləşib. Fransanın indiki vəziyyətinin bütün məsuliyyəti birmənalı olaraq Makronun üzərinə düşür. Əminəm ki, proses getdikcə daha ciddi xarakter alaraq, nəticə etibarı ilə Makron dünyagörüşü və aqressiyasının sonunu gətirəcək. Əks təqdirdə, Fransa daha geniş həcmdə beynəlxalq aləmdən təcrid olunmağa məhkumdur".

Qeyd edək ki, Fransa Milli Assambleyası (parlamentin aşağı palatası) Mişel Barnier hökumətinə etimadsızlıq haqqında qətnamənin lehinə səs verib. Nazirlər Kabinetinə etimadsızlıq səsverməsini 331 deputat dəstəkləyib. Bu isə o deməkdir ki, bu ilin yayında olan seçkilərdən sonra prezident Makron hələ də stabil hökumət formalaşdıra bilmir.

Müxalifət həmçinin Makronun da istefasını tələb edir. Lakin Fransa prezidenti televiziya açıqlamasında istefa verməyəcəyini bəyan edib. Bununla belə, onun siyasi vəziyyəti heç də yaxşı deyil. Belə ki, son rəy sorğularına görə, Fransa əhalisinin 50 faizi Makronun istefasını istəyir. Bu haqda "Cluster 17"nin apardığı sosial sorğuda qeyd edilir. Fransızların 36%-i düşünür ki, hökumətə qarşı münasibət prezident Makronun baş nazir təyin etməkdə səhv seçim etməsindən qaynaqlanır. Fransızların 40%-i mövcud çıxılmaz vəziyyətdən qurtulmaq üçün mümkün həllin olmadığına inanır. Eyni sorğuya əsasən, fransızların 54%-i prezident Makronun istefasını və 2025-ci ildə növbədənkənar prezident seçkilərinin keçirilməsini istəyir.

Rüfət Sultan