İordaniya lideri Kral II Abdullah fələstinlilərin Qəzzadan və İordan çayının qərb sahilindən köçürülməsinə qarşı "sarsılmaz mövqeyini" bəyan edib.

Qaynarinfo xəbər verir ki, bu barədə CNN yazır.

Tramp çərşənbə axşamı Vaşinqtonda İordaniya kralı ilə birgə mətbuat konfransı zamanı ABŞ-ın Qəzzada nəzarəti ələ alması və fələstinlilərin anklavdan çıxarılması planını təsdiqləyib.

II Abdullah Trampın ideyasını açıq şəkildə rədd etməsə də, "tələsməməyi" tövsiyə edib və tezliklə alternativ təkliflərin ortaya çıxacağını bildirib.

Daha sonra II Abdullah X sosial şəbəkəsində paylaşım edərək fələstinlilərin köçürülməsinə qarşı "vahid ərəb mövqeyinin" mövcud olduğunu qeyd edib:

"Fələstinlilərin köçürülmədən Qəzzanın bərpası və dəhşətli humanitar böhranın həlli hamı üçün prioritet olmalıdır".

Bununla yanaşı, II Abdullah Tramp ilə danışıqları "konstruktiv" adlandırıb.

Nəşrin məlumatına görə, Trampın planına əsasən, İordaniya və Misir milyonlarla yeni fələstinli qaçqını qəbul etməlidir – bu ideyaya hər iki ölkə qarşı çıxır.

Daha əvvəl Tramp ABŞ-ın Qəzza sektoruna nəzarəti ələ alacağını bəyan edib və orada fələstinlilərin davamlı gələcəyinin olmadığını düşündüyünü bildirib.

- 16 yanvar – Qətərin paytaxtı Dohada İsrail və HƏMAS arasında Qəzzada saxlanılan girovların azad edilməsi və atəşkəsin başlanması ilə bağlı rəsmi saziş imzalanıb.
- 17 yanvar – İsrail baş naziri Benyamin Netanyahunun ofisi İsrail və HƏMAS danışıqlar qruplarının sazişi imzaladığını təsdiqləyib.
- 19 yanvar – HƏMAS üç israilli qadın girovun adını açıqladıqdan sonra İsrail Qəzzada atəşkəs rejiminin qüvvəyə mindiyini elan edib.
- HƏMAS Qəzza şəhərində üç israilli qadını Beynəlxalq Qırmızı Xaça təhvil verib. Bu, atəşkəs qüvvəyə mindikdən sonra baş verən ilk girov azad edilməsi olub.

Alpər