Xezertv.info xəbər verir ki, 15 mart tarixində Azərbaycan Respublikası Mədəniyyət Nazirliyinin dəstəyi və Gənclərin Həmrəyliyi İctimai Birliyinin təşkilatçılığı ilə Mədəniyyət Nazirliyinin Mədəni və Yaradıcı Sənayelərin təşviqi üzrə qrantı çərçivəsində “CultBazaar” yarmarkası keçirildi. Yarmarka Gənclərin Həmrəyliyi İctimai Birliyinin İcraçı direktoru Ramilə El-oğlunun açılıș nitqi ilə bașladı. Daha sonra rəsmi qonaq qismində Azərbaycan Respublikası Milli Məclisinin deputatı Naqif Həmzəyev, Azərbaycan Respublikası Mədəniyyət Nazirliyinin nümayəndəsi Heydər Rzayev və Azərbaycanda Qadın Sahibkarlığının İnkişaf Assosiasiyasının marketinq departamentinin rəhbəri Fəridə Abbaszadə çıxış etdilər. Qonaqlar gənc sahibkarlara dəstəyin əhəmiyyəti və yolları ilə bağlı öz fikir və təəssüratlarını bölüşdülər.
Açılış mərasimindən sonra yarmarka öz işinə start verdi. Yarmarkada gənc mədəni və yaradıcı sahibkarlar öz əl işlərini, əsərlərini, yaradıcı məhsullarını təqdim etdilər. Sahibkarların biznesinə dəstək vermək məqsədilə təşkil olunmuş yarmarka daxilində, həmçinin, “Rəqəmsal mədəniyyət və innovasiya”, “Yaradıcı şəxslər üçün şəxsi brendinq” və “Startap və yaradıcı biznesin qurulması” adlı vörkşoplar da təşkil olundu. Adıçəkilən vörkşoplar bu sahəyə maraqlı 75-dən çox gəncin mədəni və yaradıcı istiqamətdə bilik və bacarıqlarının gücləndirilməsinə, bu istiqamətdə məlumatlılığın artırılmasına dəstək oldu.
Qeyd edək ki, layihənin keçirilməsində əsas məqsəd vahid fiziki platforma vasitəsilə milli-mədəni məhsul və xidmətlərin insanlar arasında tanınmasına və satışına dəstək göstərilməsi, mədəni və yaradıcı sənaye sahəsinə maraqlı tərəflərin şəbəkələşməsi və potensiallı gənclərin bacarıqlarının (əl işləri, dizayn, rəssamlıq, incəsənət və s.) işıqlandırılması, mədəni məhsullarla məşğul olan gənclərin şəbəkəsini yaratmaqdır. Yarmarka "CultHUB: Yaradıcı sənayenin inkişafı və rəqəmsallığın təşviqi platforması" layihəsi çərçivəsində keçirilir.