Yaz və yay fəslində ilan və həşərat sancmaları artır. Mart ayı ərzində Kliniki Tibbi Mərkəzin Toksikologiya şöbəsinə zəhərlənmə səbəbi ilə 104 nəfər qəbul edilib. Onların yalnız bir nəfəri ilan sancması ilə tibb müəssisəinə daxil olub. Lakin ötən illərin statistikalarına baxanda görünür ki, bu say may-avqust aylarında artır.

Xüsusilə, bölgələrdə ilan və həşərat sancmalarına daha çox rast gəlinir. Tibbdə isə ilan zəhərlənməsinə qarşı zərdabdan istifadə olunur.

İlan sancan şəxsin 12 saat ərzində və daha tez xəstəxanaya çatdırlmalı olduğunu nəzərə alsaq, ölkənin bütün tibb müəssisəsələri zərdabla təmin olunubmu?

Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) Bizim.Media-nın sorğusuna cavab olaraq bildirilib ki, tibb müəssisələrində zərdablarla təminat lazımi səviyyədədir:

"Mövsümlə əlaqədar olaraq həşərat, əsasən də ilan sancmaları ilə bağlı müraciətlərin sayının artma ehtimalı nəzərə alınaraq TƏBİB-in tabeliyindəki aidiyyəti üzrə bütün tibb müəssisələri, yəni rayon mərkəzi xəstəxanaları, ilkin səhiyyə müəssisələri tələbnaməyə uyğun olaraq zərdablarla təmin olunub".

Qurumun məlumatında əhaliyə zəhərli həşəratlara qarşı ehtiyatlı olmağa çağırış da yer alıb.