Bonn görüşlərinin ikinci günündə müzakirələr gərgin keçir. Tərəflər gündəliyin qəbul edilməsi ilə bağlı ümumi razılığa gəlməyə çalışırlar.

Bu isə nəticələrin əldə edilməsinin heç də asan başa gəlməyəcəyini göstərir.

Gündəliyin qəbul edilməsi üçün müzakirələrin getdiyi ərazidə ekofəallar etiraz aksiyası da keçiriblər.

Onlar "Amazoniyaya azadlıq", "Qazıntı yanacaqlarına yox", "Bizim gələcəyimiz satılmır!", "İqlim liderliyi neftdən ibarət deyil!" kimi pankart açıb, şüarlar, bəyanatlar səsləndiriblər.

Bonn görüşlərində müxtəlif ölkələri, qurumları təmsil edən iştirakçıların hər biri Almaniyadakı müzakirələrdən müxtəlif nəticələr gözləyir.

"Gözləntimiz ilk olaraq maliyyə gündəliyinin qəbul olunmasıdır. Sonra Paris razılaşmasının 9.1-ci maddəsində nəzərdə tutulan məsələlərin konkret həll yollarının tapılmasını istəyirik. G7 ölkələrinin maliyyələşmə ilə bağlı prosesi pozan addımlarının necə həll ediləcəyini gözləyirik", ‒ deyə Kot-D`İvuar nümayəndəsi Acaratou Malika Sisse bildirib.

Görüşlərin ikinci günündə baş verən ən önəmli məsələlərdən biri isə müzakirələrin gündəliyinin təsdiq edilməsi prosesi olub.

İki gündür təsdiqi gecikən gündəlik bu gün Azərbaycan nümayəndə heyətinin Braziliyaya dəstəyindən sonra öz həllini tapıb. Bu gün Bonn görüşləri üçün çox önəmli bir tarix oldu.

Müzakirələrin gündəliyi COP30-un ev sahibi kimi Braziliya tərəfindən razılaşdırılmalı idi. Lakin gündəliyin qəbulu ilə bağlı yaranmış mürəkkəb vəziyyətlə əlaqədar olaraq Braziliya tərəfi Azərbaycana yardım üçün müraciət edib. Bundan sonra Azərbaycan nümayəndə heyəti bütün tərəflərlə intensiv danışıqlar apararaq gündəliyin qəbul edilməsinə nail olub. Braziliyada keçiriləcək COP30-un baş icraçı direktoru Ana Amelia Kampos Toni dəstəyə görə Azərbaycana təşəkkür edib və Belemdəki konfransa necə hazırlaşdıqlarına diqqət çəkib:

"Biz Belemi COP-a hazırlamaq üçün Azərbaycandan öyrənirik. Hələlik hazır deyilik, ancaq COP30 gəldiyi zaman hazır olacağıq. Adaptasiya və ədalətli enerji keçidi çox önəmli mövzulardır. Azərbaycanla birlikdə biz iqlim maliyyəsini 1.3 trilyon dollara çatdırmağa çalışırıq. Bununla birlikdə Braziliya Azərbaycan ilə birlikdə ortaq məqsədlər üçün fəaliyyətləri genişləndirir".

Daha ətraflı Baku TV-nin videomaterialında: