Ermənistan parlamentinin keçmiş deputatı Ruben Akopyan ölkədə “hökuməti devirməyə ictimai çağırışlar” ittihamı ilə həbs edilib.

“Qafqazinfo” TASS agentliyinə istinadən xəbər verir ki, bu barədə bu gün Yerevan Ümumi Yurisdiksiya Məhkəməsi qərar qəbul edib.

Bundan əvvəl Ermənistan İstintaq Komitəsi Akopyanın saxlanıldığını açıqlamışdı. O, hökumətin devrilməsinə açıq çağırışlarda ittiham olunur. İstintaq siyasətçiyə qarşı belə ittihamların irəli sürülməsini iyulun 1-də dərc olunmuş müsahibə ilə əlaqələndirib. Bir neçə hüquq müdafiəçisi isə bəyanat verərək müxalif siyasətçi R.Akopyanın təqibini söz azadlığının boğulmasının növbəti təzahürü adlandırmışdılar.

Qeyd edək ki, iyunun 18-də isə Ermənistan Daxili İşlər Nazirliyi “Taşir” Şirkətlər Qrupunun prezidenti və təsisçisi Samvel Karapetyanı saxlayıb. O, hakimiyyətin ələ keçirilməsinə açıq çağırışlarda ittiham olunur. Karapetyanla bağlı iki ay müddətinə həbs qərarı çıxarılıb. Terror aktları hazırlamaqda və hakimiyyəti ələ keçirməyə cəhddə şübhəli bilinən arxiyepiskop Baqrat və arxiyepiskop Mikael Acapaxyan, həmçinin “Müqəddəs mübarizə” müxalifət hərəkatının tərəfdarları da eyni ittihamla həbs ediliblər.