Masallı, 30 sentyabr 2025 – Masallı rayonunun Musaküçə kəndində yerləşən şadlıq sarayında tanınmış rabitəçi, Masallının ictimai həyatında silinməz iz qoymuş Əliş Əliyevin həyat və fəaliyyətinə həsr olunmuş sənədli filmin təqdimat mərasimi keçirilib.
Tədbirdə yaradıcı insanlar, ictimaiyyət nümayəndələri, media mənsubları, ziyalılar, Əliş Əliyevin ailə üzvləri və keçmiş iş yoldaşları iştirak ediblər.
Mərasim ulu öndər Heydər Əliyevin və unudulmaz şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Sənədli film Əliş Əliyevin zəngin ömür yolunu, rabitə sahəsində göstərdiyi xidmətləri və Masallı üçün gördüyü dəyərli işləri əks etdirir. Ekran əsəri Cənub bölgəsində fəaliyyət göstərən "Cənubunsəsi" xəbər portalı tərəfindən ərsəyə gətirilib. Filmin ideya və ssenari müəllifi portalın təsisçisi, baş redaktoru və ictimai fəal bloger Mərhəmət Lələyevdir.
Filmin nümayişindən sonra Mərhəmət Lələyev çıxış edərək “Tarixin yaddaşında qalanlar” layihəsinin əhəmiyyətindən danışıb. O, yalnız Əliş Əliyevin deyil, ümumilikdə cənub bölgəsinin işıqlı şəxsiyyətlərinin həyat yolunu əks etdirən sənədli filmlərin gələcək nəsillər üçün mühüm irs olacağını qeyd edib.
Çıxış edən digər natiqlər də Əliş Əliyevin həyat yolu, rabitə sahəsindəki xidmətləri və Masallının inkişafı üçün gördüyü işlər barədə öz fikirlərini bölüşüblər.
Əliş Əliyevin oğlu Soltanağa Əliyev tədbirdə çıxış edərək atasının xatirəsinin daim hörmətlə anıldığını vurğulayıb və filmin ərsəyə gəlməsində əməyi keçən çəkiliş heyətinə, həmçinin dəstək göstərən hər kəsə minnətdarlığını bildirib.
Qeyd edək ki, sənədli film mərasim iştirakçıları tərəfindən böyük maraqla qarşılanıb və Masallı ictimaiyyətində dərin təəssürat yaradıb.
Sonda Mərhəmət Lələyev, filmin ərsəyə gəlməsində göstərdikləri köməklik və dəstəyə görə Müsaküçə kənd sakinlərinə və Əliş Əliyevin oğlu Soltanağa Əliyevə öz dərin təşəkkürünü ifadə edib.



Ulusestv.az