5 Oktyabr – Beynəlxalq Müəllimlər Günü münasibətilə Lənkəran rayonu M.H.Mirzəcanov adına Yuxarı Nüvədi kənd tam orta məktəbində növbədənkənar pedaqoji şura iclası keçirilib. Tədbirdə məktəb rəhbərliyi, müəllim kollektivi və gənc pedaqoqlar iştirak ediblər.
Tədbiri giriş sözü ilə açan məktəbin direktoru Ramiz Ramazanov çıxış edərək bütün müəllimləri bu əlamətdar gün münasibətilə səmimi qəlbdən təbrik edib. O, qeyd edib ki, müəllimlik dünyanın ən müqəddəs və məsuliyyətli peşələrindən biridir. Müəllimlər cəmiyyətin mənəvi sütunu, elm və maarifin daşıyıcıları, millətin gələcəyini formalaşdıran əsas qüvvədir.
Ramiz Ramazanov çıxışında bildirib: “Müəllim yalnız bilik ötürən deyil, eyni zamanda vətəndaşlıq duyğularını formalaşdıran, gənc nəslin dünyagörüşünü, əxlaqını, milli-mənəvi dəyərlərini möhkəmləndirən şəxsiyyətdir. Bu gün hər birimizin həyatında müəllim izləri var. Hər bir uğurumuzun, nailiyyətimizin arxasında bir müəllimin zəhməti dayanır.”
İclas zamanı məktəbin pedaqoji kollektivinin 2024–2025-ci tədris ilində tədris və tərbiyə sahəsində qazandığı nailiyyətlərdən danışılıb. Müəllimlərin şagirdlərin bilik səviyyəsinin artırılmasında, nizam-intizamın və mədəni davranışın formalaşmasında gördükləri işlər xüsusi vurğulanıb.
Tədbirdə həmçinin pedaqoji şuranın gündəliyinə daxil edilmiş bir sıra təşkilati məsələlər də müzakirə olunub, tədris prosesinin keyfiyyətinin daha da yüksəldilməsi istiqamətində mühüm qərarlar qəbul edilib.
Daha sonra məktəb rəhbərliyi tərəfindən bir qrup müəllim uzunmüddətli səmərəli pedaqoji fəaliyyətinə, tədris və tərbiyə işində göstərdiyi məsuliyyətə və fədakarlığa görə Təşəkkürnamə ilə təltif edilib. Təltif olunan müəllimlər göstərilən diqqət və qayğıya görə məktəb rəhbərliyinə minnətdarlıqlarını bildiriblər.
Mərasim zamanı gənc müəllimlərin çıxışları da tədbirə xüsusi rəng qatıb. Onlar müəllim adının məsuliyyətindən, bu peşəyə olan sevgilərindən danışaraq bildiriblər ki, bugünkü gənc nəsil öz peşə borcunu yerinə yetirərkən təcrübəli pedaqoqlardan örnək alır.
Sonda məktəb direktoru Ramiz Ramazanov bir daha kollektiv üzvlərini təbrik edərək onlara möhkəm can sağlığı, ailə səadəti və işlərində uğurlar arzulayıb. O, qeyd edib ki, təhsil sahəsinə göstərilən dövlət qayğısı hər bir müəllimi daha da ruhlandırır və yeni nailiyyətlərə səsləyir.
Tədbir səmimi təbriklər, xatirə şəkillərinin çəkilməsi və mehriban kollektivi bir araya gətirən xoş ovqatla yekunlaşıb.
Xezertv.info redaksiyası bütün müəllimləri 5 Oktyabr – Beynəlxalq Müəllimlər Günü münasibətilə ürəkdən təbrik edir!
Əziz müəllimlər, gənc nəslin formalaşmasında, Vətənə sədaqətli, savadlı və mənəviyyatlı övladların yetişməsində göstərdiyiniz fədakar əməyə görə Sizə dərin minnətdarlığımızı bildiririk. Sizin zəhmətiniz Azərbaycanın gələcəyinə işıq saçır. Hər zaman hörmət və ehtiramla anıldığınız bu gözəl gündə Sizə möhkəm can sağlığı, uzun ömür və yaradıcılıq uğurları arzulayırıq.


Fərid Faiqoğlu
Xezertv.info-nun rəhbəri
“Qızıl Qələm” mükafatçısı
“Azərbaycan Jurnalistlər Birliyi”nin üzvü
Azərbaycan Vətən Müharibəsi Veteranları İB-nin fəxri üzvü
Qayğıya Ehtiyacı və Əlilliyi Olan Şəxslərə Dəstək İB-nin mətbuat katibi