“Xezertv.info” xəbər verir ki, Şirvan-Salyan Regional Gənclər və İdman İdarəsinin təşkilatçılığı ilə Heydər Əliyevin əziz xatirəsinə həsr olunmuş futzal üzrə Şirvan şəhər idarə və müəssisələri arasında keçiriləcək mini-futbol çempionatının püşkatma mərasimi baş tutub. 04–23 may 2026-cı il tarixlərini əhatə edəcək yarışlara hazırlıq artıq yekun mərhələyə qədəm qoyub.
Ölkədə idmanın inkişafı, sağlam həyat tərzinin təşviqi, gənclərin və əmək kollektivlərinin idmana cəlb olunması dövlət siyasətinin prioritet istiqamətlərindən biri kimi diqqət mərkəzindədir. Xüsusilə idarə və müəssisələr arasında təşkil olunan idman yarışları əməkdaşlar arasında həmrəyliyin möhkəmləndirilməsi, sağlam rəqabət mühitinin formalaşdırılması və kollektiv ruhunun gücləndirilməsi baxımından mühüm əhəmiyyət daşıyır.
Qeyd edək ki, Shirvan Operating Company Ltd şirkətinin futbol komandası uzun müddətdir müxtəlif yarışlarda fəal iştirak edərək uğurlu nəticələr qazanır. Komanda ilə Şirvan Olimpiya İdman Kompleksi arasında bağlanmış müqaviləyə əsasən, idmançılar mütəmadi şəkildə bu məkanda məşq edir, peşəkar hazırlıq keçərək şəhər və region səviyyəli turnirlərdə layiqli çıxış nümayiş etdirirlər.
Təşkilatçılar yarışda iştirak edəcək bütün komandalara uğurlar arzulayaraq bildiriblər ki, qarşıdakı oyunlar dostluq, qarşılıqlı hörmət və yüksək idman prinsipləri çərçivəsində keçiriləcək. İştirakçıların öz bacarıq və potensiallarını maksimum səviyyədə nümayiş etdirəcəklərinə inam ifadə olunub.
Çempionatın Şirvan şəhərində idman həyatına yeni dinamika qatacağı, iştirakçılar arasında sağlam rəqabəti və komanda ruhunu daha da gücləndirəcəyi gözlənilir.