Redaksiyamıza daxil olmuş məlumata əsasən, həkim-anestezioloq Pərvaz Kişiyevin hazırda "VIP Milan Hospital" tibb müəssisəsində LOR (otorinolarinqoloq) həkimi kimi fəaliyyət göstərdiyi bildirilir. Həmçinin əldə etdiyimiz məlumata görə, o, əvvəllər "Vimay" klinikasında anestezioloq vəzifəsində çalışıb.
Məlumatın ictimai maraq kəsb etdiyini nəzərə alaraq, Azərbaycan Respublikasının "Media haqqında" Qanununa və jurnalist etikasına uyğun şəkildə Pərvaz Kişiyevə və onun köməkçisinə "WhatsApp" vasitəsilə mətbuat sorğusu ünvanladıq.
Sorğumuzda aşağıdakı məsələlərə aydınlıq gətirilməsini xahiş etmişdik:
• Pərvaz Kişiyev hazırda "VIP Milan Hospital"da hansı vəzifədə çalışır?
• Onun LOR həkimi kimi fəaliyyət göstərməsi ilə bağlı hansı ixtisas və sertifikasiya sənədləri mövcuddur?
• Sertifikasiya imtahanını hansı ixtisas üzrə verib?
• Xəstəxanada LOR həkimi kimi pasiyent qəbul edib-etmədiyi barədə rəsmi mövqe nədir?
Sorğumuza cavab olaraq aşağıdakı məzmunda cavab təqdim edildi:
"Salam. Sorğunuz tərəfimizdən qeydə alınmışdır. Bildirmək istəyirik ki, xəstəxanamız həkimlərimiz və pasiyentlərimizlə bağlı hər hansı məlumatı yalnız qanunvericiliyin tələblərinə uyğun olaraq, səlahiyyətli hüquq-mühafizə orqanlarının rəsmi sorğusu əsasında təqdim edir. Qeyd edək ki, müraciətiniz və əlaqə nömrəniz artıq hüquq-mühafizə orqanlarına təqdim edilmişdir. Bundan sonrakı bütün məsələlər qanunvericiliyin tələblərinə uyğun qaydada araşdırılacaqdır. Təşəkkür edirik."
Bu cavabda redaksiyamızın ünvanladığı konkret suallara birbaşa cavab verilməyib. Xüsusilə, Pərvaz Kişiyevin hazırda hansı ixtisas üzrə fəaliyyət göstərməsi, sertifikasiya sənədinin hansı ixtisasa aid olması və LOR həkimi kimi fəaliyyəti barədə sorğuda qaldırılan məsələlər cavablandırılmayıb.
Media nümayəndələrinin vəzifəsi ictimai maraq doğuran məsələləri araşdırmaq və bütün tərəflərin mövqeyini işıqlandırmaqdır. Tibb sahəsi isə birbaşa insan sağlamlığı ilə bağlı olduğundan, həkimlərin ixtisası, sertifikasiyası və fəaliyyət istiqaməti barədə ictimaiyyətin suallar verməsi təbii qarşılanmalıdır. Bu cür suallara aydın və konkret cavabların verilməsi həm şəffaflığın, həm də ictimai etimadın güclənməsinə xidmət edir.
Redaksiyamız hər hansı nəticəyə gəlmək niyyətində deyil və yalnız faktların aydınlaşdırılmasını qarşıya məqsəd qoyur. Hazırda açıq qalan əsas suallar bunlardır:
• Pərvaz Kişiyev hazırda "VIP Milan Hospital"da rəsmi olaraq hansı ixtisas üzrə fəaliyyət göstərir?
• Onun qüvvədə olan sertifikasiya şəhadətnaməsi hansı ixtisasa aiddir?
• Əgər LOR həkimi kimi fəaliyyət göstərirsə, bunun hüquqi və peşəkar əsasları nədən ibarətdir?
Qeyd edək ki, redaksiyamız bu suallara cavab almaq üçün aidiyyəti dövlət qurumlarına da müraciət etməyi planlaşdırır. Məqsəd hər hansı şəxs və ya tibb müəssisəsi barədə ittiham irəli sürmək deyil, ictimai maraq doğuran məsələlərin rəsmi məlumatlar əsasında araşdırılmasıdır.
Onu da xatırladaq ki, redaksiyamıza daxil olmuş məlumata görə, Pərvaz Kişiyev əvvəllər "Vimay" klinikasında anestezioloq kimi çalışıb. Hazırda isə onun "VIP Milan Hospital"da LOR həkimi kimi fəaliyyət göstərdiyi bildirilir. Bu məlumatların dəqiqləşdirilməsi məqsədilə araşdırmamız davam edir.
Hal-hazırda "VIP Milan Hospital"ın rəhbəri Xuraman Muradovadır.
Redaksiyamız qarşı tərəfin mövqeyini dərc etməyə hazırdır. Mövzu ilə bağlı yeni rəsmi məlumatlar və ya izahat daxil olacağı təqdirdə, onlar olduğu kimi oxucularımıza təqdim ediləcək.