“Standart vəziyyətlərdən və qapıçı səhvlərindən qollar buraxdıq”.

Bunu ”Report”a açıqlamasında 17 yaşadək qadın futbolçulardan ibarət Azərbaycan millisinin baş məşqçisi Nərgiz Qurbanova Avropa çempionatının seçmə mərhələsinin II raundunda keçirilən qarşılaşmalar barədə danışarkən deyib.

Mütəxəssis Azərbaycan millisinin seçmə mərhələdə ilk iki oyunda qeydə alınan məğlubiyyətləri şərh edib:

“İlk oyunumuz Bolqarıstana qarşı oldu. Böyük hesabla məğlub olduq. Nəzərə alsaq ki, Bolqarıstan millisi A Liqasından B Liqasına düşüb, oradan gələn millilərlə oynamaq bizim üçün çox çətin olur. Üstəlik, Bolqarıstana oyundan bir gün öncə gəldik. Altı qol buraxmağımız, nəticənin belə olmasının yol yorğunluğundan irəli gəldiyini düşünürəm. Hesab daha fərqli ola bilərdi. Bolqarıstanın təcrübəli olması sözünü dedi. Sloveniya qrupun aşkar favoritidir. Heyətlərində təcrübəli, texniki cəhətdən güclü oyunçuları var. Ümumiyyətlə, Bolqarıstan və Sloveniya kimi yığmalara qarşı oyunlar Azərbaycanın qadın futbolçuları üçün çox çətin keçir. Burada təcrübə amili də böyük rol oynayır”.

Nərgiz Qurbanova turnirdə son matçı qələbə ilə başa vurmaq istədiklərini diqqətə çatdırıb:

“Son oyun Moldova millisinə qarşı olacaq. Əsas məqsədimiz 3 xal qazanmaqdır. Son görüşü qələbə ilə başa vurmaq istəyirik. Futbolçularımız qalibiyyət üçün əllərindən gələni edəcəklər”.

Qeyd edək ki, Azərbaycan millisi Avropa çempionatının seçmə mərhələsinin 2-ci raundu çərçivəsində B liqasının 2-ci qrupunda Bolqarıstana 1:6, Sloveniyaya 0:4 hesabı ilə uduzub. Yığmamız sabah son görüşündə Moldova ilə qarşılaşacaq.