“InvestAZ” dünya maliyyə bazarları ilə bağlı həftəlik analizi təqdim edib.

Yapon yenası həftənin əvvəlində Yaponiyanın rüblük ÜDM-i ilə bağlı yekun göstəricilərin proqnozların altında dərc olunmasından sonra dollar qarşısında dəyər itirir. USDJPY valyuta cütlüyü bugün 141.960 həddindən 143.070 həddinə qədər yüksəlib. Eyni zamanda, EURUSD 1.1090 səviyyəsindən 1.1070 səviyyəsinə kimi ucuzlaşıb. Dollar indeksi isə (ABŞ-ın ticarət tərəfdaşı olan altı ölkənin valyuta səbətinə nisbətdə məzənnə) 0.14% artaraq 101.32 bənd təşkil edir.

Son rübdə Yaponiyanın ÜDM-i, yekun məlumatlara əsasən, illik ifadədə 2.9% artıb (Əgər ÜDM ardıcıl dörd rüb eyni sürətlə artıbsa). Proqnozlar isə 3.1%-lik artımın olması yönündə idi. Rüblük ifadədə artım 0.7% təşkil edib. Qeyd etmək lazımdır ki, ötən həftə Amerika valyutası yen qarşısında 2.7% ucuzlaşıb. Cümə günü açıqlanan məlumatlar isə ABŞ-ın Qeyri-kənd Təsərrüfatı Sektorunda Yeni Yaranan İş Yerlərinin Sayının proqnozların altında olduğunu göstərdi.

Yeni həftənin başlaması ilə qızılın qiyməti ABŞ Federal Ehtiyatlar Sisteminin (FED) qərarları ərəfəsində və dolların bir qədər bahalaşması sonunda ucuzlaşır. Səhər saatlarında dəyərli metal 2500$ səviyyəsindən 2487$ səviyyəsinə qədər ucuzlaşdı, hal-hazırda isə 2490$ həddində ticarət olunur.

Bu həftənin çərşənbə günü ABŞ-da inflyasiya göstəriciləri dərc olunacaq. Bazar iştirakçıları FED-in sentyabr ayında baş tuta biləcək faiz azaldılmasına dair daha çox ipucları əldə etmək ümidi ilə İstehlak Qiymətləri İndeksi göstəricilərinin dərc olunmasını maraqla gözləyirlər. Verilən məlumatlara əsasən, analitiklərin 71%-i tənzimləyici qurumun faiz dərəcəsini 5-5.25%-ə qədər, 29%-i isə 4.75-5%-ə qədər azalacağını proqnozlaşdırır.

Həftənin cümə axşamı Avropa Mərkəzi Bankı (AMB) faiz dərəcəsi ilə bağlı qərarını açıqlayacaq. Analitiklərin proqnozlarına əsasən mərkəzi bank uçot dərəcəsini 4.25%-dən 3.65%-ə qədər endirəcək. Həmçinin, həftə ərzində dərc olunacaq Almaniyada inflyasiyaya dair göstəricilər, Avrozonanın Sənaye Sektorunda İstehsal Həcmi, Böyük Britaniyada İşsizlik Səviyyəsi, ölkə ÜDM-i və sənaye sektoruna dair rəqəmlər investorların diqqət mərkəzində olacaq digər əsas xəbərlərdir.

İnvestisiya ilə bağlı suallarınızı: *1234 telefon nömrəsi və ya www.investaz.az veb saytı vasitəsilə bizə ünvanlaya bilərsiniz.

“İNVEST-AZ İnvestisiya Şirkəti” QSC-nin Tədris və Analiz Departamenti

“İNVEST-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikasının Mərkəzi Bankı tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

Risk bildirişi

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İNVEST-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.