“Azərbaycanda 800 minə yaxın aktiv vergi ödəyicisi var. Onların sayı artmaqda davam edir”.
“Qafqazinfo” xəbər verir ki, bunu iqtisadiyyat naziri Mikayıl Cabbarov “Vergi Xidməti - 25: Davamlı inkişaf və effektiv transformasiya” Forumunda bildirib.
“Vergi işçilərinin sayı isə 3 minə yaxındır. Bizim bu iki qrup arasında sayda ciddi balansa nail olmaq niyyətimiz yoxdur. Əksinə, niyyətimiz var ki, maksimal şəkildə vergi bazasını daha yığcam, daha çevik və daha az sayda fəaliyyət göstərən kollektiv həyata keçirə bilsin. İnsan kapitalı Vergi Xidməti üçün əsas dəyərdir”, - M.Cabbarov qeyd edib.
İqtisadiyyat naziri həmçinin əlavə edib ki, Azərbaycan iqtisadiyyatı üçün prioritet sahələrdə ciddi vergi güzəştləri tətbiq olunur: “İşğaldan azad edilmiş ərazilərimizin reinteqrasiyasına görə təşviqlər, həssas sosial təbəqələr üçün güzəştlər, özəl sektoru stimullaşdıran addımlar, sənaye parklarında rezidentlər üçün azadolmalar, startaplar üçün stimullar, ekoloji mühiti inkişaf etdirən vergi güzəştlərini qeyd etməliyik. Bunlar ölkəmizdə iqtisadi aktivliyə, sosial rifaha və qeyri-neft sektorunun inkişafına təkan verən mühüm islahatlar paketini təşkil edir.

Vergi sistemində islahatlar və qanunvericilikdə dəyişikliklər “2022-2026-cı illərdə sosial-iqtisadi inkişaf Strategiyası”nın hədəfləri ilə uzlaşır”.

Gülnar Əliyeva