Yeni araşdırmalar göstərir ki, iqlim böhranı yalnız buzlaqların əriməsi və dəniz səviyyəsinin yüksəlməsi ilə məhdudlaşmır, həm də birbaşa insan bədəninə təsir edir. İnsan skeleti karbon qazının artan konsentrasiyasına cavab olaraq sürətlə zəifləyərək əriyir.

“Qafqazinfo” xəbər verir ki, avstraliyalı tədqiqatçılar Aleksandr Larkomb və Fil Biervirt 1999-2020-ci illər arasında ABŞ-də yetkinlərin qan məlumatlarını araşdırıb.

Nəticələr göstərir ki, qanda karbon qazının əlavə məhsulu olan bikarbonat səviyyəsi bu dövrdə 7 faiz artıb və bu, atmosferdə karbon qazının artımı ilə birbaşa əlaqəlidir.

Qandakı bikarbonat səviyyəsi artdıqca, sümük sağlamlığı üçün vacib olan kalsium və fosfor miqdarı azalır. Bədən karbon balansını qorumaq üçün sümüklərdəki bu mineralları “qurban verir”. Normalda sümüklər bu itkiləri bir neçə həftə ərzində bərpa edə bilir, lakin yüksək karbon səviyyələri artıq “yeni norma” halına gəldiyindən, kalsium bərpa olunmur və xalis mineral itkisi baş verir.

İnsan bədəninin təkamülü atmosferdə sabit karbon səviyyəsinə uyğunlaşıb. Lakin son 25 ildə hava çirkliliyi sümükləri bu dəyişikliklərə uyğunlaşmağa məcbur edir.

“Əgər mövcud tendensiya davam edərsə, 50 il ərzində karbon səviyyəsi sağlam hesab edilən həddini aşacaq və kalsium, fosfor minimum səviyyələrdən aşağı düşəcək”, - tədqiqatçılar xəbərdarlıq edir.

Bu vəziyyətin uzunmüddətli fizioloji nəticələri hələ tam öyrənilməyib, lakin alimlər skelet zəifləməsinin bütün insanlara təsir etdiyini və təcili həll edilməli olduğunu vurğulayıblar.