20 oktyabr “Energetiklər Günü” ilə bağlı “Azərenerji” ASC-nin əməkdaşları “Yaşıl Dünya naminə həmrəy olaq” devizi ilə Mingəçevir, Gəncə və İmişlidəki enerji obyektlərinin ərazisində ağacəkmə aksiyaları keçiriblər.
“Qafqazinfo” xəbər verir ki, ağacəkmə aksiyalarının keçirilməsində əsas məqsəd ölkədə ekologiyanın qorunması və ətraf mühitin sağlamlaşdırılması, o cümlədən ekoloji mədəniyyəti, təbiətə olan qayğı hissini təbliğ etməkdir.
Energetiklərin peşə bayramı ilə əlaqədar ən böyük ağacəkmə aksiyası Mingəçevirdəki “Azərbaycan” İstilik Elektrik Stansiysının ərazisində tikilən 1880 MVt-lıq Elektrik Stansiyasının həyətində keçirilib. Bu isə səbəbsiz deyil. Çünki məhz energetiklər günü 1981-ci ilin 20 oktyabrında Ulu Öndər Heydər Əliyevin təşəbbüsü ilə “Azərbaycan” İES-in birinci blokunun istismara verilməsi tarixi ilə əbədiləşib və Cənab Prezident İlham Əliyevin 2004-cü ildə imzaladığı sərəncamı ilə hər il 20 oktyabr tarixi energetiklərin peşə bayramı kimi qeyd olunur.
Sonda onu da vurğulayaq ki, hazırda Mingəçevirdə ölkənin ən böyük elektrik stansiyası tikilir və yeni tikilən stansiyanın şərti yanacaq sərfiyyatı “Azərbaycan” İES-in digər blokları ilə müqayisədə hər kilovat saat üçün 120 qram azalmaqla 225 qram təşkil edəcək ki, bununla da illik 1,2 milyard kub metr təbii qaza qənaət ediləcək, eyni zamanda ətraf mühitə atılan karbon qazının miqdarı 2 milyon ton azalacaq. Onu da nəzərə çatdıraq ki, BMT-nin İqlim Dəyişikliyi ilə bağlı əsas müddəaları arasında “yaşıl enerji” və enerjinin effektivliyi öndə gəlir.
Bu səbəbdən də enerji effektivliyi xüsusi önəm daşıyan bu stansiyada geniş yaşıllıq salınması ətraf mühitin qorunmasına əlavə töhvədir.