Lənkəran rayonunda yol-nəqliyyat hadisəsi baş verib.

“Qafqazinfo”nun məlumatına görə, qəza Lənkəran-Lerik magistral yolunun rayonun Şağlaküçə kəndi ərazisindən keçən hissəsində qeydə alınıb.

Belə ki, “Audi Q7” markalı minik avtomobili idarəetmədən çıxaraq yol kənarındakı qaz borusuna çırpılıb. Zərbənin təsirindən boru qırılıb, avtomobil suötürücü kanala aşıb.

Hadisə nəticəsində avtomobildə olan 1973-cü il təvəllüdlü Maya Əbdüləzim qızı Hüseynova və yaxın qohumlar - 1953-cü il təvəllüdlü Yelena İvan qızı, 1981-ci il təvəllüdlü Ruslan Fərman oğlu, 1988-ci il təvəllüdlü Günel Cahangir qızı Qurbanovlar, həmçinin azyaşlılar - 2019-cu il təvəllüdlü R.Qurbanov və 2014-cü il təvəllüdlü F. Qurbanov müxtəlif dərəcəli bədən xəsarətləri alıblar.

Yaralılar dərhal rayon xəstəxanasına çatdırılıb. Onlara ilkin tibbi yardım göstərildikdən sonra müalicələrinin davamı üçün müvafiq şöbələrə yerləşdiriliblər.

Faktla bağlı araşdırma aparılır.

***

Lənkəran Rayon Mərkəzi Xəstəxanasının məlumatına görə, yol-nəqliyyat hadisəsi zamanı xəsarət alan 6 nəfər (3 qadın, 3 kişi olmaq) xəstəxananın Təcili yardım şöbəsinə hospitalizasiya olunub.

Onlara bədənin müxtəlif nayihələrinin çoxsaylı travması, qapalı kəllə-beyin travması, said sümüklərinin sınığı diaqnozları təyin olunub. Xəsarət alan şəxslərdən biri (qadın) vəziyyətinə uyğun olaraq Reanimasiya şöbəsinə yerləşdirilib. Diğər xəsarət alanların müalicəsi Cərrahiyyə şöbəsində davam etdirilir. Vəziyyətləri stabil qiymətləndirilir.

Surxay Şahbazov