Ukraynalı milyarder Rinat Əhmədov Monakoda 471 milyon avro (təxminən 936 milyon manat) dəyərində nəhəng lüks mənzil alaraq, daşınmaz əmlak tarixində rekord əməliyyatlardan birini həyata keçirib.

“Qafqazinfo” xəbər verir ki, sövdələşmə barədə ilk məlumatı “Bloomberg” yayıb.

Bildirilib ki, mənzil Monako Knyazlığının Monte Karlo bölgəsində yerləşən Mareterra dənizkənarı layihəsinin tərkibində olan “Le Renzo” yaşayış binasında yerləşir.

2024-cü ilin sonlarında istifadəyə verilən bu kompleks dünyanın ultra-varlı alıcılarını cəlb edən ən eksklüziv layihələrdən biri hesab olunur.

Məlumata görə, beşmərtəbəli mənzil 21 otaqdan ibarətdir və təxminən 2500 kvadratmetr sahəni əhatə edir. Yaşayış yerində şəxsi hovuz, cakkuzi və ən azı səkkiz avtomobil üçün dayanacaq mövcuddur.

Sənədlərə və elektron yazışmalara əsasən, əməliyyat 2024-cü ildə tamamlanıb. Əhmədovun holdinqi olan “System Capital Management” (SCM) alışı təsdiqləsə də, əmlakın detalları və qiyməti barədə əlavə məlumat verməyib.

Bildirilib ki, şirkətin beynəlxalq investisiya portfeli uzun illərdir daşınmaz əmlak sahəsini də əhatə edir və “Le Renzo” layihəsinə investisiya 2021-ci ildə həyata keçirilib.

Məlumatlara görə, alış müqaviləsi Rusiyanın 2022-ci ildə Ukraynaya genişmiqyaslı hücumundan əvvəlki dövrə aiddir.

Qeyd edək ki, 60 yaşlı Rinat Əhmədov Ukrananın ən varlı insanı, “Şaxtyor” futbol klubunun sahibidir. “Bloomberg Billionaires Index”ə əsasən, Əhmədovun sərvəti 7 milyard dollardan çox qiymətləndirilir. O, sərvətini Ukraynanın polad, mədənçilik, enerji və daşınmaz əmlak sektorlarında fəaliyyət göstərən “System Capital Management” (SCM) vasitəsilə formalaşdırıb.

Əlavə edək ki, “Le Renzo” yerləşdiyi Mareterra layihəsi artıq Monakoda dünyanın ən bahalı ünvanlarından biri hesab olunur. Burada kvadratmetr qiymətləri 100 min avronu keçir, bəzi obyektlərdə aylıq kirayə haqları 150 min avroya qədər yüksəlir.

Bazar araşdırmalarına görə, Monako məhdud torpaq sahəsi və yüksək tələbat səbəbindən dünyanın ən bahalı daşınmaz əmlak bazarı olaraq qalır və qiymətlər rekord səviyyələrdə saxlanılır.