Türkiyənin xarici işlər nazirliyinin sözçüsü Öncü Keçeli İsrail tərəfindən saxlanılan “Azadlıq flotiliyası”nda olan 3 türk millət vəkilinin ölkəyə qayıtdığını açıqlayıb.

“Qafqazinfo” xəbər verir ki, o bu haqda sosial şəbəkə hesabında paylaşım edib.

“Digər 18 vətəndaşın Türk Hava Yollarının təşkil etdiyi xüsusi reyslə sabah günortadan sonra ölkəmizə qayıtması gözlənilir”, - o bildirib.

Qeyd edək ki, Ö. Keçeli ötən gün həmin şəxslərin öncə Azərbaycana təxliyə ediləcəklərini açıqlamışdı. Onlar günorta saatlarında Azərbaycan Hava Yollarının reysi ilə İsrailin Təl-Əviv şəhərindəki Ben Qurion hava limanından Bakıya yola düşüb. 

Xatırladaq ki, “Azadlıq flotiliyası” Qəzzaya humanitar yardım aparmaq üçün sentyabrın sonunda yola çıxmışdı. 9 gəmidən ibarət olan donanmada təqribən 150 nəfər iştirakçı yer almışdı. Onların arasında türkiyəli deputatlar, aktivistlər, jurnalistlər, hüquqşünaslar da olub. Oktyabrın 8-də gəmilər beynəlxalq sularda israilli hərbçilər tərəfindən saxlanılıb. Gəmilərin heyəti isə İsraildən deportasiya edilib.