ABŞ Müdafiə Nazirliyinin rəhbəri Lloyd Ostinin xəstəxanaya yerləşdirilməsinin maraqlı təfərrüatı ortaya çıxıb.

Məlum olub ki, naziri tibb müəssisəsinə aparmaq üçün gələn təcili yardım maşınından Pentaqonun rəhbərinin evinə sirenlər və sayrışan işıqlar olmadan gəlməsi tələb olunub.

Bu barədə “ABC News”un əldə etdiyi zəng stenoqramından aydın olub.

Mənbənin məlumatına görə, yanvarın 1-də bununla bağlı təcili xidmətə zəng edən şəxs hər şeyi “lazımsız səs-küy olmadan” etmək istəyib.

“Biz bir az görünməz qalmağa çalışırıq”, - deyə telefon danışığının bir hissəsi sitat gətirilib.

Eyni zamanda jurnalistlər bunun qanuna uyğun olmadığını bildiriblər. Yerli qanunlar təcili yardım maşınlarının sirenlərini və əsas yollarda işıqlarını yandırmasını tələb edir.

Xatırladaq ki, yanvarın 1-i axşam Ostin “Uolter Rid” Milli Tibb Mərkəzində (Meriland) xəstəxanaya yerləşdirilib, yanvarın 2-də isə onun bəzi səlahiyyətləri Ketlin Hiksə verilib. Onun xəstəxanada olması barədə hətta ABŞ Prezidenti Co Baydenin də xəbəri olmayıb. Ağ Ev rəhbəri bu barədə yanvarın 4-də, rəsmi press-reliz dərc edilməzdən cəmi 15 dəqiqə əvvəl xəbər tutub. Sonradan ABŞ Dövlət katibi Antoni Blinken də bu məsələdən gec xəbər tutduğunu etiraf edib.

Nazir artıq xəstəxanadan buraxılıb və həkimlərinin göstərişi ilə Pentaqona tam qayıdana qədər öz vəzifələrini bir müddət məsafədən yerinə yetirəcək.