Böyük Britaniyanın baş naziri Kir Starmer bəyan edib ki, "müharibə zamanı seçkilərin dayandırılması tamamilə məntiqlidir".

Qaynarinfo xəbər verir ki, bu barədə Britaniya hökumətinin saytında qeyd olunub.

"Baş nazir Ukraynanın demokratik yolla seçilmiş lideri kimi prezident Zelenskini dəstəklədiyini bildirib və müharibə dövründə seçkilərin dayandırılmasının tamamilə məntiqli olduğunu söyləyib. Böyük Britaniya da İkinci Dünya Müharibəsi zamanı eyni addımı atmışdı", - materialda qeyd olunub.

Bununla yanaşı, Britaniya baş naziri Ukraynada sülhə nail olunması istiqamətində ABŞ-ın səylərini dəstəklədiyini bildirib.

Ukrayna prezident seçkiləri məsələsi yenidən gündəmə gəlib. Belə ki, çərşənbə axşamı ABŞ və Rusiya nümayəndələri Səudiyyə Ərəbistanında Ukrayna ilə bağlı danışıqlar aparıblar. Bu danışıqlardan sonra Tramp Ukraynada seçkilərin keçirilməsinin vacib olduğunu bəyan edib.

Məlum olduğu kimi, seçkilərin keçirilməsi tələbi Putinin əsas vasitələrindən biridir.

The Telegraph nəşrinin yazdığına görə, Putinin əsas məqsədi Zelenskini siyasi arenadan uzaqlaşdırmaqdır, çünki o, Kremlin Ukraynanı əsarət altına almaq planlarına ən çox mane olan şəxsdir. "Rusiya Federal Təhlükəsizlik Xidmətinin (FSB) xüsusi xidmət orqanlarının onu öldürə bilməməsi biabırçılıq hesab edilir. Kremlin hazırda ən böyük ümidi seçkilərin keçirilməsinə təkan vermək, onlara müdaxilə edərək adət etdiyi üsullarla prosesə təsir göstərmək və Moskvaya bağlı bir kukla namizədin qələbəsini təmin etməkdir. Bu şəxs isə Zelenskinin qəti şəkildə rədd edəcəyi alçaldıcı sülh sazişini imzalayacaq", – deyə jurnalistlər qeyd ediblər.

Alpər