2015-ci ildə imzalanmış Birgə Hərtərəfli Fəaliyyət Planı (JCPOA) artıq İran üçün keçmişdə qalmış bir təcrübədir və bu sazişə qayıtmaq niyyətində deyillər.

Oxu.Az TASS-a istinadən xəbər verir ki, bu barədə İranın Xarici İşlər Nazirliyinin rəhbəri Abbas Əraqçı İtaliyanın paytaxtı Roma şəhərində ABŞ ilə danışıqların ikinci raundundan sonra məlumat verib.

"Biz açıq şəkildə bildirdik ki, İranda çoxları artıq JCPOA-nı bizim üçün uğurlu anlaşma hesab etmirlər. Onlar üçün bu sazişdən qalan yeganə şey çıxarılmış dərsdir. Şəxsən mən də bununla razıyam", - deyə o, "X" sosial şəbəkəsindəki hesabında yazıb.

Əraqçının sözlərinə görə, hazırda bu danışıqların gələcəyi ilə bağlı müəyyən nikbinlik mövcuddur. O əlavə edib ki, gələcək sazişin çərçivəsinin müəyyənləşdirilməsi istiqamətində irəliləyiş əldə olunub.

Qeyd edək ki, ABŞ və İran arasında İranın nüvə proqramı ilə bağlı fikir ayrılıqlarını aradan qaldırmaq məqsədilə aparılan dolayı danışıqların ikinci raundu aprelin 19-da keçirilib.