Azərbaycan ərazisində qanunsuz dini təbliğat fəaliyyəti aparan xarici ölkə vətəndaşları barəsində hüquqi tədbirlər görülüb.

Qaynarinfo xəbər verir ki, bu barədə Dövlət Təhlükəsizliyi Xidmətinin mətbuat xidməti məlumatg yayıb.

Daxil olmuş məlumatlar əsasında Dövlət Təhlükəsizliyi Xidməti və Dövlət Miqrasiya Xidmətinin birgə keçirdikləri tədbirlər nəticəsində müəyyən edilib ki, başqa dövlətin ərazisində yerləşən dini mərkəzə bağlı olan əcnəbilər – 1968-ci il təvəllüdlü Şeyx Məhəmməd Hənif (Shaikh Muhammad Hanif), 1981-ci il təvəllüdlü Kərim Bux (Kareem Bux) və 1968-ci il təvəllüdlü Çanna Tac Məhəmməd (Channa Taj Muhammad) Azərbaycanda qeyri-ənənəvi dini cərəyana aid ideyaların təbliği ilə məşğul olublar.

Onların qanunsuz qapalı dini yığıncaqlar və dini ayinlər təşkil etdikləri də müəyyənləşdirilib.

Toplanmış materiallar əsasında həmin şəxslərin "Dini etiqad azadlığı haqqında” Azərbaycan Respublikasının Qanununu pozduqları aşkar edilib və onların bu əməllərinin qarşısı alınıb. Sözügedən şəxslər Azərbaycan Respublikası Miqrasiya Məcəlləsinin 79.1.2-ci maddəsinə əsasən ölkə hüdudlarından kənarlaşdırılıblar.