19 sentyabr - Azərbaycanda erməni separatizminin kökünün kəsildiyi günün (antiterror əməliyyatı) ikinci ildönümüdür.

Hər saniyə, dəqiqəsi
qəhrəmanlıq salnaməsi -
“24 Saat”!
Vətən torpağına içilən and -
Neçə-neçə Şəhid Ad...
O saatlarda Xocalı bir Bayraq dikəldi,
“44 Gün” bir boy diksinmişdi...
Daha neçə-neçə əsir-yesir yurd yerimiz
sinəmizdə çalın-çarpaz dərd-sərimiz...
Korşalan yaddaşımızın yadırğadığı,
yağıların yağmaladığı,
gəda yadların-yanların yalmandığı
yurd yerimiz Xankəndimiz
“24 Saat”la gələndə üzbəüz,
qərinələr, illər 24 saata sığındı, sığdı.
Üzündün-gözündən zəfər sevinci yağdı.
Yağdı zəfər sevinci
qələbə qoxulu qazilərin qayəsindən.
Yağdı Tanrı yarı Şəhidlərin ruhuna
Azərbaycan səmasından,
Uca Bayraq simasından,
Qarabağın havasından,
Xarıbülbül həvəsindən,
Ərənlərin dünyasından,
Anaların duasından,
Körpələrin yuxusundan,
Dan yerinin yaxasından
cənnət qoxulu rəhmət.
“24 Saat” Azərbaycanın haqq səsi!
Hər saniyə, dəqiqəsi
qəhrəmanlıq, Zəfər salnaməsi -
“24 Saat” Qarabağ vaxtı -
Vaxtın taxtı!


Tapdıq ƏLİBƏYLİ