"Ali Baş Komandanımız İlham Əliyev həmişə münaqişəni sülh yolu ilə həll etməyə çalışırdı, lakin düşmən bizi məcbur etdi ki, torpaqlarımızı savaş yolu ilə azad edək".

Bu sözləri Oxu.Az-a açıqlamasında şəhid kapitan Həmidağa Hüseynzadənin atası Bağı Hüseynzadə deyib.

O, 44 günlük müharibənin həm kədər, həm də qürur hissləri ilə yadda qaldığını deyib:

"Həmin 44 günün hər gününün bir ağrısı, bir sevinci var idi. Hər gün şəhid verirdik, amma eyni zamanda, hər gün bir kəndi, bir qəsəbəni, bir şəhəri düşməndən azad edirdik. Bu torpaqlar şəhidlərimizin canı və qanı bahasına azad olundu".

Şəhid atasının sözlərinə görə, oğlu, Xüsusi Təyinatlı Qüvvələrin kapitanı Həmidağa Hüseynzadə döyüşlərin ön cəbhəsində olub:

"Oğlum xüsusi təyinatlıların kapitanı idi. Döyüşə ilk atılanlar məhz onlar idilər. Ali Baş Komandanımızın da dediyi kimi, bu Qələbənin qazanılmasında xüsusi təyinatlıların böyük rolu var. Mən fəxr edirəm ki, bu tarixi Qələbədə oğlumun da az da olsa payı var".

Şəhid atası xalqımızı Zəfər Günü münasibətilə təbrik edib. Qazilərimizə cansağlığı, şəhidlərimizə Allahdan rəhmət diləyib.

Töhfə Səməd