Azərbaycan xalqının tarixində elə günlər var ki, onlar millətin varlığını, qürurunu və gələcəyə inamını özündə cəmləyir. 1991-ci ilin 18 oktyabr tarixi də məhz belə günlərdəndir. Həmin gün Azərbaycan Respublikasının Ali Soveti “Dövlət Müstəqilliyi haqqında Konstitusiya Aktı”nı qəbul etdi və bununla da əsrlərlə davam edən azadlıq arzusu reallığa çevrildi. Bu gün Azərbaycan xalqının milli kimliyinin, dövlətçilik iradəsinin və azadlıq istəyinin təntənəsidir.
Saray Bələdiyyəsinin sədri, Abşeron rayon Ağsaqqallar Şurasının sədri, şəhid Vidadi Zalovun atası Nizami Zalov bu tarixi gün barədə dərin qürurla bildirir: “18 oktyabr – Azərbaycan Respublikasının Müstəqilliyinin Bərpası Günüdür. Bu, bizim milli iftixarımızın, azadlığımızın və dövlətçiliyimizin təntənəsidir. Xalqımız bu müstəqilliyi canı və qanı bahasına əldə edib.”
Azərbaycan xalqı tarix boyu azad və müstəqil yaşamaq uğrunda böyük sınaqlardan keçib. 1918-ci ildə qurulan Azərbaycan Xalq Cümhuriyyəti Şərqdə ilk demokratik respublika kimi tarixə düşdü, lakin bu müstəqillik uzun sürmədi. 1920-ci ildə itirilən azadlıq arzusu 70 il boyunca xalqın yaddaşında, milli ruhunda yaşadı.
Nəhayət, 1991-ci ilin 18 oktyabrında Azərbaycan xalqı öz müstəqilliyini bərpa etdi. Bu, yalnız siyasi hadisə deyil, həm də mənəvi dirçəliş, tarixi ədalətin bərpası idi. Nizami Zalov qeyd edir: “Müstəqilliyin bərpası bizim nəsillərin arzusunu reallaşdırdı. Lakin azadlıq heç vaxt asan qazanılmayıb. O, həm keçmişdə, həm də bu gün şəhidlərin qanı ilə qorunur.”
Azərbaycanın müstəqilliyi uğrunda canını fəda edən qəhrəmanların içində Nizami Zalovun oğlu, şəhid Vidadi Zalov da var. O, torpaqlarımızın azadlığı, Vətənin bütövlüyü uğrunda döyüşlərdə qəhrəmancasına şəhid olub.
Atası Nizami Zalov deyir: “Mənim oğlum və onun kimi minlərlə şəhid gənc bu torpaq, bu dövlət, bu bayraq üçün canını verdi. Müstəqilliyin əsl dəyəri onların qanı ilə ölçülür. Bizim borcumuz onların xatirəsini yaşatmaq və bu dövlətçiliyi qorumaqdır.”
Bu sözlər təkcə bir ata fəryadı deyil, həm də xalqın mübarizə tarixinin simvoludur. Müstəqilliyimizin bu gün əldə etdiyi möhkəm dayaqlar şəhidlərin ruhu üzərində ucalıb.
Azərbaycan müstəqilliyini elan etdikdən sonra qarşısında böyük sınaqlar dururdu. 1990-cı illərin əvvəllərində ölkə ağır böhran içində idi. Dövlətçiliyin itirilməsi təhlükəsi yaranmışdı. Məhz belə bir məqamda Ulu Öndər Heydər Əliyev xalqın təkidli tələbi ilə hakimiyyətə qayıdaraq Azərbaycanı xaosdan xilas etdi, müstəqil dövlətin təməlini möhkəmləndirdi.
Nizami Zalov bu barədə belə deyir: “Heydər Əliyev Azərbaycanın xilaskarı, müstəqilliyimizin memarı oldu. O, dövlətçiliyi möhkəmləndirdi, xalqı bir amal ətrafında birləşdirdi. Əgər o vaxt Heydər Əliyev olmasaydı, bəlkə də bu gün Azərbaycan adlı dövlət olmazdı.”
Bu fikirlər bir ağsaqqalın həyat təcrübəsindən gələn gerçək etirafdır. Ulu Öndərin müdrik siyasəti nəticəsində Azərbaycan bu gün müstəqil, güclü və sabit bir dövlət kimi mövcuddur.
Bu gün Azərbaycan Prezidenti İlham Əliyevin rəhbərliyi ilə müstəqilliyimiz daha da möhkəmlənib. Ölkəmiz regionun siyasi, iqtisadi və hərbi baxımdan ən güclü dövlətlərindən birinə çevrilib.
Nizami Zalov qeyd edir: “Prezident İlham Əliyevin müdrik rəhbərliyi ilə Azərbaycan dünya miqyasında öz sözünü deyən güclü dövlətdir. 44 günlük Vətən müharibəsində qazandığımız Qələbə müstəqilliyimizin əsl rəmzidir. O Qələbə həm torpaqlarımızın azadlığı, həm də xalqımızın birliyinin təntənəsi idi.”
Doğrudan da, 2020-ci ilin payızında Azərbaycan xalqı Müzəffər Ali Baş Komandanın rəhbərliyi altında illərlə həsrətində olduğu torpaqları azad etdi və öz müstəqilliyini, suverenliyini bir daha dünyaya sübut etdi.
Abşeron rayon Ağsaqqallar Şurasının sədri kimi Nizami Zalov daim gənc nəslə vətənpərvərlik ruhu aşılayır, şəhidlərin qəhrəmanlığını xatırladır. O, inanır ki, müstəqilliyin qorunması yalnız dövlətin deyil, həm də hər bir vətəndaşın borcudur.
“Müstəqillik Allahın bizə verdiyi ən böyük nemətdir. Onu qorumaq üçün hər bir azərbaycanlı məsuliyyət hiss etməlidir. Gənclər bilməlidirlər ki, azadlıq, bayraq, dövlət sözləri sadəcə anlayış deyil – bu, Vidadi kimi şəhidlərin canı ilə qazanılmış müqəddəs dəyərlərdir.”
Bu nəsihət bir ömür boyu dövlətə və xalqına xidmət etmiş bir ağsaqqalın həyat fəlsəfəsidir.
Bu gün 18 oktyabr Azərbaycan xalqı üçün sadəcə bir tarix deyil, həm də milli varlığımızın, birliyimizin və qürurumuzun rəmzidir.
Nizami Zalovun sözləri ilə desək: Müstəqilliyimiz xalqımızın qanı ilə, şəhidlərimizin ruhu ilə yoğrulub. Onu qorumaq, daha da möhkəmləndirmək bizim müqəddəs borcumuzdur. Azərbaycan dövlətinin bayrağı bu torpaqda əbədi dalğalanacaq.”
Bu fikirlər bir şəhid atasının, bir ağsaqqalın və bir vətənpərvər insanın ürəyindən gələn sözlərdir.
Yaşasın müstəqil Azərbaycan! Yaşasın 18 oktyabr – qürur və azadlıq günümüz.


Fərid Faiqoğlu
Xezertv.info-nun rəhbəri
AJB-nin üzvü