YAP Nərimanov rayon təşkilatı və SOCAR – Kompleks Qazma İşləri Trestinin birgə təşkilatçılığı ilə “Şəhərsalma və Memarlıq ili” çərçivəsində 15 İyun - Milli Qurtuluş Gününə həsr olunmuş tədbir keçirilib.

“Qafqazinfo” xəbər verir ki, tədbirdə YAP Nərimanov rayon təşkilatının sədri Elçin Quliyev, SOCAR Kompleks Qazma İşləri Trestinin rəisi Rəşad Əsgərov, Milli Məclisin deputatı, YAP İdarə Heyətinin üzvü Hikmət Babaoğlu, Milli Məclisin deputatı Samir Vəliyev, YAP İdarə Heyətinin üzvü, Elmi-Tədqiqat Kardiologiya İnstitutunun şöbə müdiri Tofiq Cahangirov, Azərbaycan Şəhər Bələdiyyələrinin Milli Assosiyasının sədri, Nərimanov Bələdiyyəsinin sədri Təmraz Tağıyev və “Sahil” İstehsalat Bölümünün rəisi Saday Allahverdiyev iştirak ediblər.

YAP Nərimanov rayon təşkilatının sədri Elçin Quliyev bildirib ki, 15 iyun Azərbaycan xalqı üçün yüksək əhəmiyyətə malik tarixi gündür. Bu tarixi yaradan isə Azərbaycanın inkişafında, müstəqilliyində müstəsna rol oynayan Ulu öndər Heydər Əliyev olub.

Çıxışçılar həmçinin qeyd edib ki, Ulu öndərin xalqımıza bəxş etdiyi müstəqilliyin Prezident İlham Əliyev tərəfindən davam etdirilməsi ölkəmizin müdrik siyasətinin daha da möhkəmlənməsinə səbəb olub.

Həmçinin bildiriblər ki, Azərbaycanın artıq regionun gündəliyini diktə edən dövlətə, dünya güclərinin hesablaşdığı bir qüvvəyə çevrilib.

Tədbirin davamında YAP Nərimanov rayon təşkilatının ictimai-siyasi həyatında fəal iştirakına görə bir qrup şəxs Təşəkkürnamə ilə təltif olunub. Daha sonra tədbir bədii hissə ilə davam edib.