Gündəlik rasion və qida seçimləri insanın emosional vəziyyətinə və psixoloji sağlamlığına birbaşa təsir göstərir.

“Qafqazinfo” xəbər verir ki, bu barədə rusiyalı endokrinoloq Zöhrə Pavlova öz teleqram kanalında məlumat paylaşıb.

Mütəxəssisin sözlərinə görə, qidanın əhval-ruhiyyəyə təsiri xüsusi eksperiment zamanı sübut olunub.

Araşdırma çərçivəsində depressiya və maddələr mübadiləsi pozuntusu olan şəxslərə yarımfabrikat qidaların qəbulunu 85 faiz azaltmaq tapşırılıb. Bu müddətdə iştirakçıların qəbul etdiyi dərmanların dozası, fiziki aktivlik səviyyəsi və yuxu rejimi dəyişməz olaraq qalıb.

Sınağın nəticəsində diaqnostik şkalalar üzrə həmin şəxslərin depressiya və təşviş göstəricilərində hiss olunacaq dərəcədə azalma qeydə alınıb.

Z. Pavlova bildirib ki, bu effekti qidalanmanın bağırsaq mikroflorasına və mərkəzi sinir sisteminə olan təsiri ilə izah etmək mümkündür.

“Əgər daha az təşviş keçirmək və özünüzü daha gümrah hiss etmək istəyirsinizsə, ilk növbədə rasionunuza yenidən baxmağınız məsləhətdir”, - deyə endokrinoloq vurğulayıb.