Azərbaycan Yazıçılar Birliyinin "Natəvan" zalında təbiət mövzusunda şeirlərdən ibarət "Yaşılım, yaşılım, hara gedirsən" adlı toplunun təqdimat mərasimi duyğulu, möhtəşəm poeziya bayramı ovqatı ilə süsləndi...

Azərbaycan Yazıçılar Birliyinin "Regional Hüquqi və İqtisadi Maarifləndirmə" İctimai Birliyinin dəstəyi ilə çap etdirdiyi topluya AYB-nin sədri, Xalq yazıçısı Anar "Dünyanın yaşıllıq həsrəti" başlıqlı "Ön söz" yazıb.
Bu dəyərli nəşrin ideya müəllifi AYB sədrinin müavini Rəşad Məcid, tərtibçisi AYB-də multikultural məsələlər üzrə məsul şəxs Xatirə Fərəcli, redaktoru Əməkdar mədəniyyət işçisi şair Vaqif Bəhmənlidir.

Qeyd edim ki, topluda mənim də imzam yer alıb. Zəhməti keçən hər kəsə minnətdarlıqla, klassiklərimizə ehtiramla, həyatda olmayan müəlliflərə rəhmət diləyilə topluda çap olunan çağdaş ədəbiyyat təmsilçilərimizi məmnuniyyətlə "Dindi könül meşə, cəmən dilində" seirimlə təbrik edirəm!

Səhər mehi sığal çəkir yarpağa,
Zümrüd meşə dalğalanır dəniztək.
Tamaşadır təravəti torpağa,
Müşk-ənbərdir taladakı biçənək...

Dindi könül meşə, çəmən dilində,
Heyrətimə misra-misra bələndim.
Öz dili var, çiçəyin də, gülün də,
Uşaqlıqdan bu əsrara bələdəm...

Ağaclar da duyğuludur yaz çağı,
Göz oxşayan gözəlliklər bərq vurur.
Təbiətin tər, qənirsiz, naz çağı
İlham sözə, söz ilhama vurulur ...
✍ Tapdıq ƏLİBƏYLİ