Birləşmiş Millətlər Təşkilatının Baş katibi Antonio Quterreşlə İranın xarici işlər naziri Abbas Əraqçi arasında telefon danışığı olub.

“Qafqazinfo” xəbər verir ki, tərəflər bölgədəki hərbi əməliyyatlar və son hadisələri müzakirə ediblər.

Əraqçi İranın “məcburi müharibə” adlandırdığı vəziyyətə qarşı özünü müdafiə etmək üçün ayrılmaz hüquqa malik olduğunu vurğulayıb.

Onun sözlərinə görə, İran öz təhlükəsizliyinin və vətəndaşlarının həyatının qorunmasını fundamental və müzakirə olunmayan bir məsuliyyət hesab edir.

İranın xarici işlər naziri həmçinin Birləşmiş Millətlər Təşkilatının beynəlxalq sülh və təhlükəsizliyin qorunması ilə bağlı məsuliyyətlərinə toxunaraq, İran hökuməti və xalqının BMT Baş katibinin və BMT Təhlükəsizlik Şurasının təcavüzü və həyata keçirilən hərəkətləri açıq şəkildə pisləmək üçün daha güclü və məsuliyyətli mövqe tutmasını gözlədiyini vurğulayıb.

O deyib ki, bu cür addımlara qarşı susqunluq və ya qeyri-kafi reaksiyalar regionda davamlı qeyri-sabitliyə və gərginliyin artmasına səbəb ola bilər.

Telefon danışığı zamanı BMT Baş katibi də ABŞ və İsrailin İrana qarşı həyata keçirdiyi hücumların xarakterinə toxunaraq, beynəlxalq hüquqa hörmət edilməsinin və gərginliyin daha da artmasının qarşısının alınmasının vacibliyini vurğulayıb. O bildirib ki, İranın özünü müdafiə etmək hüququ ilə bağlı heç bir şübhə yoxdur.

Antonio Quterreş münaqişənin genişlənməsinin qarşısının alınmasının və onun regionda yarada biləcəyi humanitar və təhlükəsizlik nəticələrinin azaldılmasının vacibliyini vurğulayıb.