Bakı şəhərinin Xəzər rayonu ərazisində günorta saatlarında yol-nəqliyyat hadisəsi baş verib. Hadisə nəticəsində gənc xanım xəsarət alıb.
Hadisə zamanı ərazidə olan Ulusestv.az informasiya portalının əməkdaşı İbrahim İsgəndərov hadisəyə biganə qalmayaraq dərhal xəsarət alan xanımın köməyinə çatıb. O, operativ şəkildə ilkin tibbi yardım göstərərək zərərçəkənin vəziyyətinin ağırlaşmaması üçün zəruri köməklik edib.
Daha sonra İbrahim İsgəndərov xəsarət alan xanımın xəstəxanaya çatdırılmasını təmin edib. Onun vaxtında müdaxiləsi və nümayiş etdirdiyi vətəndaşlıq mövqeyi hadisə zamanı insan amilinin, həmrəyliyin və qarşılıqlı yardımın nə qədər əhəmiyyətli olduğunu bir daha göstərib.
Jurnalistlik fəaliyyəti yalnız cəmiyyətə informasiya çatdırmaqdan ibarət deyil. Bu peşə eyni zamanda insanlara həssas münasibət, məsuliyyət və çətin anlarda vətəndaşlıq mövqeyi nümayiş etdirməyi də tələb edir. İbrahim İsgəndərovun hadisə zamanı göstərdiyi davranış məhz bu insani keyfiyyətlərin bariz nümunəsidir.
Qeyd edək ki, yol-nəqliyyat hadisələri zamanı zərərçəkənlərə vaxtında yardım göstərilməsi xüsusi əhəmiyyət daşıyır. Hər bir vətəndaşın belə məqamlarda diqqətli, məsuliyyətli və yardımsevər olması cəmiyyətimiz üçün mühüm dəyərdir.
Ulusestv.az-ın əməkdaşı İbrahim İsgəndərovun bu addımı insanlığa, mərhəmətə və vətəndaş məsuliyyətinə verilən dəyərin nümunəsi kimi qiymətləndirilə bilər.
Arzu edirik ki, xəsarət alan xanım tezliklə sağalaraq sağlamlığına qovuşsun!

Ulusestv.az