Azərbaycan Həmkarlar İttifaqları Konfederasiyasında (AHİK) İslam Əməkdaşlıq Təşkilatının (İƏT) Əmək Mərkəzinin nümayəndələri ilə görüş olub.

Konfederasiya sədri Sahib Məmmədov qurumun fəaliyyəti, həyata keçirilən islahatlar barədə məlumat verib, ittifaq üzvlərinin əmək, sosial, iqtisadi hüquqlarının və qanuni mənafelərinin müdafiəsi, sağlamlığının qorunması, müalicə və istirahətlərinin təşkili istiqamətində görülən işləri, xüsusilə son zamanlar həmkarlar ittifaqları sistemindəki yenilikləri diqqətə çatdırıb. Bildirilib ki, mütərəqqi təcrübənin tətbiqi ilə həmkarlar ittifaqlarının fəaliyyəti təkmilləşdirilir, eləcə də üzvlərə yollayışların verilməsi proseduru sadələşdirilib.

Konfederasiya sədri İƏT-in Əmək Mərkəzi ilə əməkdaşlığın əhəmiyyətini, eyni zamanda görüşdə aparılan müzakirələrin əlaqələrə, birgə layihələrin həyata keçirilməsinə töhfə verəcəyini qeyd edib.

İƏT-in Əmək Mərkəzinin Baş direktoru Azər Bayramov Mərkəzin fəaliyyətindən və Azərbaycanda həyata keçirilməsi nəzərdə tutulan layihələrdən danışıb, əmək, məşğulluq, insan kapitalının inkişafı və sosial müdafiə sisteminin gücləndirilməsi sahəsində əlaqələrin önəmini vurğulayıb.

Tərəflər əməkdaşlığın istiqamətləri, həmçinin qarşılıqlı maraq doğuran digər məsələlərlə bağlı fikir mübadiləsi aparıblar.

Sonra İƏT Əmək Mərkəzinin nümayəndələri “Kurort” Turizm İnformasiya Mərkəzinin fəaliyyəti ilə tanış olub, yollayışların verilməsi prosesində tətbiq olunan yenilikləri yüksək qiymətləndiriblər.