Azərbaycan xalqının yaddaşında elə tarixlər var ki, həmin günlər sadəcə təqvimdə qeyd olunan rəqəmlər deyil, bütöv bir millətin qürurunu, iradəsini, milli birliyini və mübarizə əzmini özündə yaşadan müqəddəs tarixlərdir. 8 Noyabr – Zəfər Günü məhz belə möhtəşəm tarixlərdən biridir. Bu gün Azərbaycanın şanlı tarixinin ən parlaq səhifəsi, xalqımızın milli qürurunun, dövlətçilik əzminin və qəhrəmanlıq salnaməsinin təntənəsidir.

2020-ci il noyabrın 8-də Azərbaycan xalqı uzun illər həsrətində olduğu tarixi ədalətə qovuşdu. Müzəffər Azərbaycan Ordusu Ali Baş Komandan, Prezident cənab İlham Əliyevin rəhbərliyi ilə Şuşa şəhərini işğaldan azad edərək xalqımıza misilsiz Zəfər sevinci yaşatdı. Bu qələbə yalnız hərbi uğur deyildi. Bu, Azərbaycanın milli iradəsinin, sarsılmaz dövlətçilik mövqeyinin, xalq-ordu birliyinin və Vətən sevgisinin bütün dünyaya nümayişi idi.

Şuşanın azad edilməsi Azərbaycan tarixində yeni bir mərhələnin başlanğıcı oldu. Qarabağın tacı, Azərbaycanın mədəniyyət beşiyi, muğamın, poeziyanın və sənətin məkanı olan Şuşa öz doğma sahibinə qayıtdı. İllərlə doğma yurdlarından didərgin düşmüş insanların qəlbində yaşayan qayıdış arzusu gerçəkləşdi. Şuşanın azadlığı ilə Azərbaycan xalqının sınmayan ruhu bir daha dünyaya bəyan edildi.

Bu Zəfərin arxasında illərlə aparılan məqsədyönlü dövlət siyasəti, güclü ordu quruculuğu, milli birlik və Vətən uğrunda canından keçməyə hazır olan igid oğullarımızın qəhrəmanlığı dayanırdı. Ulu Öndər Heydər Əliyevin müəyyən etdiyi dövlətçilik strategiyasının Prezident İlham Əliyev tərəfindən uğurla davam etdirilməsi Azərbaycanın güclənməsində, beynəlxalq mövqelərinin möhkəmlənməsində və tarixi hədəflərinə çatmasında mühüm rol oynadı.

44 günlük Vətən müharibəsi Azərbaycan xalqının necə böyük bir mənəvi gücə malik olduğunu göstərdi. Cəbhədə döyüşən əsgər və zabitlərimiz, arxa cəbhədə gecə-gündüz çalışan insanlarımız, övladını Vətənə qurban verən şəhid valideynlərimiz, yaralı döyüşçülərimizin sağalması üçün çalışan həkimlərimiz – hər kəs bu böyük Qələbənin bir parçası oldu. Azərbaycan xalqı bir yumruq kimi birləşərək öz tarixini özü yazdı.

Zəfərin ən müqəddəs səhifələrini isə Vətən uğrunda canından keçən şəhidlərimizin qanı yazdı. Onlar öz ömürlərini xalqımızın azadlığına, torpaqlarımızın bütövlüyünə və gələcək nəsillərin xoşbəxt həyatına fəda etdilər. Bu gün üçrəngli bayrağımızın dalğalandığı hər qarış torpaqda şəhidlərimizin müqəddəs xatirəsi yaşayır. Onların adları xalqımızın yaddaşına əbədi həkk olunub.

Şəhidlər ölməz, Vətən bölünməz! Bu kəlam sadəcə bir şüar deyil, Azərbaycan xalqının mənəvi andıdır. Şəhid analarının göz yaşları, ataların qürurlu baxışları, övladlarını Vətənə əmanət edən ailələrin dözümü heç vaxt unudulmamalıdır. Qazilərimizin fədakarlığı, döyüş meydanında göstərdikləri igidlik və mübarizə əzmi hər bir azərbaycanlı üçün örnəkdir. Onlara diqqət və qayğı göstərmək, şəhid ailələrinə ehtiramla yanaşmaq hər birimizin mənəvi borcudur.

Bu gün işğaldan azad edilmiş Qarabağda və Şərqi Zəngəzurda aparılan genişmiqyaslı bərpa və quruculuq işləri Zəfərimizin davam edən təntənəsidir. Yenidən qurulan şəhərlər, kəndlər, salınan yollar, məktəblər, xəstəxanalar, yaşayış məhəllələri və yaradılan müasir infrastruktur doğma torpaqlarımıza həyatın qayıdışını təmin edir. Böyük Qayıdış proqramı çərçivəsində keçmiş məcburi köçkünlərin öz doğma yurdlarına qayıtması tarixi ədalətin bərpasının ən mühüm göstəricilərindəndir.

Bu gün Qarabağda dalğalanan Azərbaycan bayrağı xalqımızın birliyinin, dövlətimizin gücünün və müstəqilliyimizin rəmzidir. Vaxtilə dağıdılmış, viran qoyulmuş torpaqlarımızda yeni həyat qurulur. Şuşada keçirilən mədəniyyət tədbirləri, Xankəndidə canlanan ictimai həyat, Laçında, Kəlbəcərdə, Ağdamda, Füzulidə və digər bölgələrdə aparılan quruculuq işləri Azərbaycanın gələcəyə inamla addımladığını göstərir.

Zəfər Günü həm də gələcək nəsillər qarşısında böyük məsuliyyət deməkdir. Biz bu tarixi yalnız qeyd etməməli, onun mahiyyətini gənclərə aşılamalıyıq. Onlar bilməlidirlər ki, bu torpaqlar asanlıqla qazanılmayıb. Hər qarış Vətən torpağının azadlığı uğrunda igidlərimiz canlarından keçiblər. Gənc nəsil şəhidlərimizin həyat yolunu öyrənməli, qazilərimizin qəhrəmanlığını tanımalı, dövlətinə, xalqına və Vətəninə sədaqətlə xidmət etməlidir.

8 Noyabr Azərbaycan xalqının tarix qarşısında öz sözünü dediyi, milli qürurunu bütün dünyaya nümayiş etdirdiyi gündür. Bu gün biz yalnız qələbəmizi deyil, həm də birliyimizi, müstəqilliyimizi, güclü dövlətimizi və sarsılmaz iradəmizi qeyd edirik. Azərbaycan xalqı sübut etdi ki, Vətən sevgisi heç bir maneə qarşısında geri çəkilmir, milli birlik isə ən böyük gücdür.

Bu möhtəşəm Zəfərin memarı və rəhbəri Prezident, Müzəffər Ali Baş Komandan cənab İlham Əliyevin qətiyyətli siyasi iradəsi, Azərbaycan Ordusunun qəhrəmanlığı və xalqımızın sarsılmaz birliyi tariximizin qızıl səhifəsinə çevrildi. Bu Qələbə Azərbaycan dövlətinin gücünü, xalqımızın əzmini və milli həmrəyliyini nümayiş etdirən əbədi bir salnamədir.

Zəfərimizin qəhrəmanları olan şəhidlərimizin xatirəsi qarşısında baş əyir, qazilərimizə möhkəm cansağlığı və uzun ömür arzulayırıq. Onların qəhrəmanlığı Azərbaycan var olduqca yaşayacaq, adları gələcək nəsillərin yaddaşında ehtiramla çəkiləcək.

Əziz xalqımız!

8 Noyabr – Zəfər Günü münasibətilə hər birinizi ürəkdən təbrik edirəm! Azərbaycan dövlətinə möhkəm inkişaf, xalqımıza firavanlıq, ölkəmizə əbədi sülh və əmin-amanlıq arzulayıram. Üçrəngli bayrağımız daim yüksəklərdə dalğalansın, dövlətçiliyimiz sarsılmaz, birliyimiz əbədi olsun!

Qoy şəhidlərimizin ruhu şad, qazilərimizin ömrü uzun, Azərbaycanımızın gələcəyi parlaq olsun!

8 Noyabr – Zəfər Günümüz mübarək!

Yaşasın müstəqil Azərbaycan!

Qarabağ Azərbaycandır!