Azərbaycan xalqının qəhrəmanlıq salnaməsində 2020-ci ilin payızı — 44 günlük Vətən müharibəsi — əbədi olaraq şərəf və qürur simvoluna çevrilib. Bu müharibə zamanı Azərbaycan Ordusunun hər bir əsgəri, hər bir zabiti torpaqlarımızın azadlığı, dövlətimizin suverenliyi uğrunda canını, qanını əsirgəmədi. Onlardan biri də igid döyüşçü, Vətən oğlu Həsənov Rəsul İqrar oğludur. O, düşmənə aman verməyən, mərdliyi ilə seçilən, Vətən sevgisini hərəkəti ilə sübut edən qəhrəmanlarımızdandır.
Rəsul Həsənov əslən Azərbaycanımızın dilbər guşəsi olan Lerik rayonunun Kürdəsər kəndindəndir. Bu torpaq tarixən mərd, vətənpərvər, sözünün arxasında duran igid oğullar yetişdirib. Rəsul da məhz belə bir ailədə, vətən sevgisi ilə yoğrulmuş mühitdə böyüyüb. Onun atası — “Avtopilot” MMC-nin rəhbəri, xeyirxah və vətənpərvər şəxsiyyət İqrar Həsənov — Lerik elində nüfuz sahibi, dövlətinə və millətinə sədaqəti ilə tanınan bir insandır. Rəsul atasının tərbiyəsi və nümunəsi ilə böyüyərək, hələ gənc yaşlarından mərdlik, insani dəyərlər və Vətən sevgisini həyatının əsas prinsiplərinə çevirmişdir.

Rəsul Həsənovun uşaqlıq illəri onun gələcək həyat yolunu müəyyən edən dövr olub. Hər zaman ata-babasının danışdığı qəhrəmanlıq dastanlarına, Qarabağ həsrətindən doğan kədərli, lakin ümid dolu söhbətlərə qulaq asardı. O, böyüdükcə anlayırdı ki, Vətən sevgisi yalnız sözlə deyil, əməl ilə sübut edilməlidir. Buna görə də daim fiziki hazırlığını möhkəmləndirir, hərbi biliklərə maraq göstərirdi.
Hələ məktəb illərindən Rəsul nizam-intizamı, qayda-qanunu sevən, dostları arasında ədalətli və dürüst davranışı ilə seçilən bir gənc idi. O, ailəsinə, kəndinə, xalqına qarşı məsuliyyət hissi ilə böyüyür, Vətən üçün gərəkli olmaq istəyirdi.
2020-ci ilin sentyabrında Ermənistan silahlı qüvvələrinin növbəti təxribatı nəticəsində Azərbaycan Ordusu Müzəffər Ali Baş Komandan İlham Əliyevin rəhbərliyi ilə "Dəmir Yumruq" əməliyyatına başladı. Ölkə üzrə bütün gənclər kimi Rəsul Həsənov da bu çağırışa könüllü şəkildə qoşuldu. Onun üçün bu, sadəcə bir hərbi xidmət deyildi — bu, Vətən borcunun ən şərəfli ifadəsi idi.
O, döyüş meydanına gedərkən ailəsinə tək bir cümlə demişdi: “Bu torpaqlar şəhid qanı ilə yoğrulub, mən də o yoldayam.”
Bu sözlər gənc bir oğulun necə dərin və sarsılmaz Vətən sevgisinə sahib olduğunu göstərir.
Rəsul Həsənov Cəbrayıl, Füzuli, Zəngilan və Qubadlı istiqamətlərində gedən ağır döyüşlərdə iştirak etmiş, düşmən mövqelərinin məhv edilməsində xüsusi igidlik göstərmişdir. Döyüş yoldaşlarının xatirələrinə görə, o, hər zaman ön cəbhədə, ən təhlükəli mövqelərdə olmağı üstün tuturdu. Onun qətiyyəti və cəsarəti ətrafındakı əsgərlərə ruh yüksəkliyi verirdi.
Bir əməliyyat zamanı düşmənin gizli atəş nöqtəsini zərərsizləşdirmək üçün könüllü olaraq irəli atılan Rəsul, soyuqqanlılıqla tapşırığı yerinə yetirərək bölmənin itkisiz irəliləməsini təmin etmişdi. Həmin hadisədən sonra komandiri onun bu igidliyini yüksək qiymətləndirmiş və onu nümunəvi döyüşçü kimi göstərmişdi.
Rəsul Həsənovun döyüş yolu, əslində, Azərbaycanın 44 günlük Zəfər tarixinin canlı səhifələrindən biridir. O, düşmən qarşısında qorxmazlığı, çevikliyi və taktiki düşüncəsi ilə seçilirdi. Döyüş yoldaşları deyirlər ki, Rəsul hər zaman "biz Vətən üçün döyüşürük" şüarını dilindən salmırdı.
Ermənistan ordusunun uzun illər ərzində qurduğu istehkam xətlərini yarmaq, minalanmış ərazilərdən keçmək asan deyildi. Amma Rəsul bu təhlükələr qarşısında bir addım da geri çəkilmədi. Onun şücaəti bir çox gəncə nümunə oldu.
44 günlük Vətən müharibəsində göstərdiyi şücaət və fədakarlığa görə, Prezident cənab İlham Əliyev tərəfindən Həsənov Rəsul İqrar oğlu bir neçə medal ilə təltif olunmuşdur. Bu mükafatlar yalnız onun fərdi qəhrəmanlığının deyil, həm də Azərbaycan gəncliyinin yüksək mənəvi dəyərlərinin təntənəsidir.
O, aldığı medallara sadəcə bir bəzək kimi baxmır. Rəsulun sözləri ilə desək: “Bu medallar mənim deyil, şəhid dostlarımın ruhuna ithafımdır. Onlar bu torpaq üçün can verdilər, biz onların yolunu davam etdirməliyik.”
Müharibədən sonra Rəsul Həsənov sivil həyata dönsə də, onun vətənə xidməti bitmədi. O, daim gənclərlə görüşür, vətənpərvərlik mövzusunda çıxışlar edir, döyüş xatirələrini bölüşür. Məktəblərdə, ictimai tədbirlərdə gənclərə səslənərək bildirir ki, “azadlıq asan qazanılmayıb, onu qorumaq hər birimizin borcudur.”
Rəsul Həsənov bu gün də dövlətçiliyin keşiyində duran, Prezident İlham Əliyevin siyasətini dəstəkləyən, milli birliyin qorunması üçün çalışan vətənpərvər gənclərdəndir. Onun ailəsi – xüsusilə atası İqrar Həsənov – oğlunun bu yolda göstərdiyi iradə və fədakarlıqla qürur duyur.
Həsənov Rəsul İqrar oğlu kimi qəhrəman gənclər Azərbaycanın sabahıdır. Onların döyüş meydanında göstərdiyi mərdlik, sülh şəraitində nümayiş etdirdiyi vətəndaş məsuliyyəti ölkəmizin gələcəyinə inamı daha da möhkəmləndirir.
44 günlük Vətən müharibəsinin iştirakçısı, igid döyüşçü Rəsul Həsənov düşmənə qan uddurmaqla yanaşı, həm də bütün bir nəsilə dərs verdi: Vətəni sevmək – sözlə deyil, əməl ilə, canla, ruhla seviləndə dəyər qazanır.
Bu gün biz Rəsul kimi igidlərin sayəsində azad torpaqlarda nəfəs alır, üçrəngli bayrağımızı qürurla dalğalandırırıq. Onların göstərdiyi şücaət, mərdlik və fədakarlıq Azərbaycan gəncliyinin qürur mənbəyidir.
Rəsul Həsənov – Vətən uğrunda döyüşən, Vətənin azadlığı üçün yaşayan, düşmənə aman verməyən qəhrəman gəncimizin adıdır.
O, həm Lerikin, həm də bütün Azərbaycanın fəxridir.
Vətən belə oğullarla güclüdür, qalibdir, əbədidir.

Fərid Faiqoğlu
Xezertv.info-nun rəhbəri,
AJB-nin üzvü,
AVMVİB-nin fəxri üzvü,
e.o. Baş leytenant