Bu gün, informasiya məkanında özünəməxsus dəst-xətti ilə seçilən, sevilən və hörmət edilən bir xanımın – “Merhemet.TV” informasiya agentliyinin təsisçi və baş direktoru, Azərbaycan Yazıçılar Birliyinin və Azərbaycan Jurnalistlər Birliyinin üzvü, “Qızıl Qələm” mükafatçısı Gülnara Həmidovanın doğum günüdür.
Bu xüsusi gündə həmkarları, dostları, oxucuları və onu tanıyan hər kəs Gülnara xanımı dərin hörmət, sevgi və minnətdarlıqla yad edir. Çünki o, peşə fəaliyyətində təkcə jurnalistikanın deyil, həm də mərhəmətin, vicdanın və vətənpərvərliyin simvoluna çevrilib.
Gülnara Həmidova informasiya sahəsində illərlə qazandığı təcrübəsi, dəqiqliyi, obyektivliyi və dürüstlüyü ilə həm peşəkar, həm də insani keyfiyyətləri bir araya gətirən xanımlardandır. Onun rəhbərlik etdiyi “Merhemet.TV” informasiya agentliyi təkcə xəbərləri çatdırmaqla kifayətlənmir, həm də cəmiyyətin mənəvi dəyərlərinin qorunmasına, şəhid ailələrinin, qazilərin, aztəminatlı insanların səsinin ictimaiyyətə çatdırılmasına xidmət edir. Məhz bu istiqamətdə aparılan məqsədyönlü fəaliyyət Gülnara xanımın ürəyinin nə qədər böyük və şəfqətli olduğunu göstərir.
“Qızıl Qələm” mükafatına layiq görülməsi, onun yaradıcılıq və ictimai fəaliyyətinin yüksək qiymətləndirilməsinin bariz nümunəsidir. Gülnara Həmidovanın yazılarında, reportajlarında və çıxışlarında Vətən sevgisi, milli ruh, humanizm və cəmiyyətə faydalı olma istəyi hər zaman ön plandadır.
Eyni zamanda, Gülnara xanım rəhbər kimi əməkdaşlarına qarşı diqqətli, qayğıkeş və insani münasibəti ilə fərqlənir. Onun rəhbərlik etdiyi kollektivdə mehribanlıq, dostluq və qarşılıqlı hörmət mühiti hökm sürür. Bu da onun peşəkarlığı ilə yanaşı, daxili mədəniyyətinin və yüksək insani keyfiyyətlərinin göstəricisidir.
Doğum günü münasibəti ilə Gülnara xanımı ürəkdən təbrik edir, ona möhkəm can sağlığı, ailə səadəti, uzun ömür və yeni yaradıcılıq uğurları arzulayırıq. Qoy qələmindən süzülən hər bir kəlmə cəmiyyətə işıq saçsın, hər bir işi sevgi və mərhəmət dolu qəlbinin əksi olsun.
Doğum gününüz mübarək, dəyərli Gülnara xanım!
Qoy həyatınız həmişə sevinc, uğur və xoş niyyətlərlə dolsun!

Hörmətlə,
Fərd Faiqoğlu
Şamil Cəfər
Çingiz Mahmudov