Bakının Xətai rayonu, Nəsrəddin Tusi və Əlağa Şıxlınski küçələrinin kəsişməsində yerləşən obyektin qarşısında heç bir rəsmi icazə olmadan dəmir konstruksiyalarla artırma işləri aparılır. Qanun pozuntusu isə təsadüfi vaxtda deyil, məqsədli şəkildə bayram və istirahət günlərində həyata keçirilir. Bu fakt, nəzarətdən yayınmaq cəhdindən və ya yerli icra strukturları ilə qeyri-rəsmi razılaşma ehtimalından xəbər verir.

Azərbaycan Respublikasının Şəhərsalma və Tikinti Məcəlləsinin 24-cü maddəsinə əsasən, hər hansı tikinti və ya artırma işi yalnız müvafiq icra hakimiyyəti orqanının verdiyi icazə sənədi əsasında həyata keçirilə bilər. Sözügedən ərazidə isə icazə lövhəsi və ya rəsmi sənəd mövcud deyil, bu da işlərin qanunsuz aparıldığını təsdiqləyir.
Həmin Məcəllənin 76.1-ci maddəsində göstərilir ki, icazəsiz tikinti və artırma işləri qanunsuz tikinti hesab olunur və dərhal dayandırılmalıdır. Eyni zamanda, Şəhərsalma və Tikinti Məcəlləsinin 3.0.10-cu maddəsinə görə, səkilər, yol kənarları və yaşayış massivləri ümumi istifadədə olan ərazilərdir və bu sahələrin hər hansı formada zəbt edilməsi qadağandır. Obyektin qarşısında aparılan artırma piyada hərəkətinə maneə yaradır, bu isə birbaşa qanun pozuntusudur.
Mediatv.az xəbər verir ki, Torpaq Məcəlləsinin 70-ci maddəsi torpaqlardan təyinatı üzrə istifadənin məcburi olduğunu təsbit edir. Ümumi istifadədə olan torpağın kommersiya məqsədilə zəbt edilməsi qanunsuzdur.Dövlət Şəhərsalma və Arxektura Komitəsindən və Fövqəladə Hallar Nazirliyinin müvafiq qurumundan rəsmi heç bir icazə alınmadan artıq tikinti işlərinə Xətai rayonunda hansı məmur icazə verdiyi müəmmalıdır.
Xatırladaq ki,Azərbaycan Respublikası Prezidentinin 24.11.2014-cü il tarixli 375 nömrəli Fərmanı ilə təsdiq edilmiş "Dövlət şəhərsalma nəzarətininhəyata keçrilməsi Qaydaları"nın 4-cü bəndinin və 2012-ci il 6 iyun tarixli 648 nömrəli Fərmanı ilə təsdiq edilmiş “Yerli icra hakimiyyətləri haqqında” Əsasnamənin 4.16-cı bəndinə əsasən icra hakimiyyətləri rayon ərazisində müntəzəm olaraq tikintilərə nəzarət məqsədilə monitorinqlər aparmalı, qanunsuz tikililərin qarşısını almaq üçün lazımi hüquqi tədbirlər görməlidirlər.
Qarşı tərəfin cavab haqqını tanıyırıq.
Mediatv.az