Zaqatala rayon sakini Zaur İsmayılovun məhkəmə prosesi və başına gələnlər haqqında xəbər vermişdik.

Yenicag.az xatırladır ki, İsmayılov Zaur bankların birinin Zaqatala filialında işlədiyi zaman “bandit İsa” kimi ad çıxarmış İsa Abdullayev adında “makler”lə tanış olur. İsa Zaura Zaqatalada və ətraf rayonlarda “əlimyandıda” olan əmlakları alıb-satmağı təklif edir. Zaur da onunla razılaşaraq İsa vasitəsilə satdığı evin pulunu, qardaşı və dostlarından aldığı, həmçinin kreditə götürdüyü pulları İsaya verir. Bir müddət keçdikdən sonra Zaur İsa tərəfindən aldadıldığını, verdiyi pullara İsa tərəfindən heç bir əmlak alınmadığını və pulların İsa tərəfindən ələ keçirildiyini bilir. İsadan pulunu tələb etdikdə İsa ona hədə-qorxu gələrək onu məhv edəcəyini deyir.

Daha sonra İsmayılov Zaur Daxili İşlər Nazirliyinə şikayət edərək 500 min manata yaxın pulunun ələ keçirildiyini qeyd edir və bununla bağlı əlində olan çox ciddi sübutları da təqdim edir. İsa da Baş Prokurorluğa şikayət edərək İsmayılov Zaura bankda depozitə qoymaq üçün 81 min manat pul verdiyini deyir. İsanın şikayəti üzrə İsmayılov Zaura cinayət işi açılır və Şəki Ağır Cinayətlər Məhkəməsi tərəfindən 5 il 6 ay azadlıqdan məhrumetmə cəzası verilir.

Şəki Ağır Cinayətlər Məhkəməsinin hökmünün ləğv edilməsi barədə İsmayılov Zaurun vəkili tərəfindən verilmiş şikayəti Şəki Apellyasiya Məhkəməsi rədd edərək Şəki Ağır Cinayətlər Məhkəməsinin hökmünü qüvvədə saxlayır. Lakin Şəki Apellyasiya Məhkəməsinin qərarından verilmiş kassasiya şikayətini Ali Məhkəmə qismən qəbul edərək Şəki Apellyasiya Məhkəməsinin qərarının ədalətsiz olduğunu, İsmayılov Zauru ittiham etmək, onun haqqında hökm çıxarmaq üçün kifayət qədər sübutların olmadığını əsas gətirərək qərarı ləğv edir və işinin yenidən baxılması üçün Şəki Apellyasiya Məhkəməsinə göndərir.

Azadlıqdan məhrum edilmiş İsmayılov Zaurun vəkili Yalçın Hacızadədən aldığımız məlumata görə, iş Şəki Apellyasiya Məhkəməsində davam edir, baxış mərhələsindədir. İşin qismən yenidən araşdırılması haqqında məhkəmə qərar qəbul edib. Ona görə növbəti məhkəmə iclasında yenidən zərəçəkənin və şahidlərin dindirilməsi, maddi sübutların araşdırılması və s. prosesual hərəkətlər aparılacaq.

Vəkilin bildirdiyinə görə, Ali Məhkəmə qərarında aşağı instansiya məhkəmələrinin qərarını ədalətsiz və qanunsuz hesab edib. Deməli, ədalətsiz qərarın nəticələri də ədalətsizdir və İsmayılov Zaurun azadlıqdan məhrum edilməsi də qanunsuzdur.

“İsmayılov Zaura bəraət verilməsi üçün kifayət qədər əsaslar var. Onun ittiham olunduğu əməli törətməsini sübut edən hal yoxdur. Zərərçəkən kimi tanınan İsa Abdullayev pulu Zaura harada verməsinə dair həm istintaqda, həm də məhkəmədə müxtəlif və ziddiyətli ifadələr verib. Bu da onun yalan danışdığını göstərir. Həmçinin İsa Abdullayev haqqında başqa şəxslərin də çoxlu şikayətlər var. Həmin şəxslər şikayət edərək bildirirlər ki, İsa onların əmlaklarının və pullarının qanunsuz yollarla ələ keçirib”, – vəkil bildirib.