Rusiya tankerinin "Anatoli Kolodkin” adlı gəmisi 31 mart səhəri 730 min barrel Urals markalı xam neftlə Kubaya çatıb. ABŞ prezidenti Donald Trampın bu gəminin keçidinə icazə verməsi faktiki olaraq adaya tətbiq edilən iki aylıq blokadanı pozub. Bu blokada ölkədə genişmiqyaslı yanacaq qıtlığına və elektrik kəsintilərinə səbəb olmuşdu.

Qaynarinfo "The Wall Street Journal”ya istinadən xəbər verir ki, Tramp Kubanı regionda "düşmən rejimlər"in aradan qaldırılması strategiyasında növbəti hədəf kimi görür, buna görə də bu addım Ağ Evin siyasətində dəyişiklik demək deyil.

Kubadakı vəziyyət Vaşinqtonun gözlədiyindən daha sürətlə pisləşir, eyni zamanda ABŞ İranla müharibə aparır. Ölkədə ictimai nəqliyyat böyük ölçüdə dayanıb, universitetlər tələbələri evə göndərib, xəstəxanalar isə yalnız təcili əməliyyatları həyata keçirir.

Kuba enerji şəbəkəsi – sovet dövründən qalma və zəif baxımlı infrastruktur – iki ümumölkəmiqyaslı nasazlıq yaşayıb və gündəlik olaraq 20 saatdan çox davam edən elektrik kəsintiləri ilə üzləşir.

Yanacaq çatışmazlığı o qədər kəskindir ki, limanda konteynerlərin boşaldılması üçün istifadə olunan kranlar belə işləmək üçün lazımi yanacaqdan məhrumdur. Eyni zamanda nəqliyyatın dayanması liman işçilərinin işə gəlməsini də çətinləşdirir.

Rusiya tankerinin gətirdiyi yardımın təsiri isə məhdud olacaq. Neftin emalı və paylanması həftələr çəkəcək və yanacaq yalnız daha sonra kritik sahələrə çatdırıla biləcək.

Tramp Kubadan nə istəyir?

ABŞ liderinin Havana ilə bağlı strategiyası rejimin gəlirlərini azaltmaq və eyni zamanda özəl sektoru gücləndirmək üzərində qurulub. Fevralın sonunda ABŞ Maliyyə Nazirliyi bəzi Amerika şirkətlərinə Kubaya yanacaq satışı üçün icazə verəcəyini açıqlayıb – bu satışlar yalnız humanitar və ya özəl sektor məqsədləri üçün nəzərdə tutulmalıdır.

Kuba artıq dövlət yanacaq inhisarını zəiflədərək özəl idxala icazə verib. Kuba rəsmiləri isə ABŞ şirkətlərinə yanacaq anbarlarının uzunmüddətli icarəsini verməyə hazır olduqlarını bildiriblər.

Razılaşma baş tutsa, ABŞ şirkətləri yanacaq üzərində nəzarəti və satış mexanizmini öz əllərində saxlaya biləcəklər. Bu, Kuba daxili yanacaq bazarında qismən özəlləşdirməyə yol aça bilər.

"Vanguard Energy” şirkəti aylıq 200 min barrel dizel və benzin tədarük etməyə hazırdır, lakin bu belə ölkənin tələbatını tam qarşılamır.

Meksika isə yaranmış vəziyyətdən istifadə etməyə çalışır və Kubaya neft tədarükünü bərpa etmək niyyətini açıqlayıb.

Kubadakı vəziyyət – əsas xəbərlər

ABŞ sahil mühafizəsi Rusiya tankerinin Kubaya keçməsinə icazə verib. Tramp isə bunun vəziyyəti əsaslı dəyişmədiyini bildirib və Kubanın "sağ qalmalı olduğunu” deyib.

Bundan əvvəl ABŞ Venesuela neftinin Kubaya ixracını bloklayıb və alternativ tədarükçüləri tariflərlə hədələyib, bu da Meksikanın da tədarükləri dayandırmasına səbəb olub.

Aydın