XTQ-nin qəhrəman döyüşçüsü, Vətənin igid oğlu Ələkbərov Zaur Zakir oğlu...
Tarixin yaddaşında elə insanlar var ki, onların həyatı sadəcə yaşanmış bir ömür deyil, bütöv bir qəhrəmanlıq məktəbidir. Belə insanlar öz iradələri, cəsarətləri və Vətən sevgiləri ilə xalqın ruhuna çevrilirlər. Azərbaycan torpağı da əsrlər boyu belə mərd oğullar yetişdirib. Bu igidlərdən biri, xüsusi təyinatlı qüvvələrin qorxmaz döyüşçüsü, Vətənin mərd oğlu Zaur Ələkbərov – Ələkbərov Zaur Zakir oğludur.
Bəzən bir insanın taleyi onun uşaqlıqdan seçdiyi yol ilə müəyyənləşir. Zaur Ələkbərovun həyatı da məhz belə talelərdəndir. Onun ömür yolu adi həyat hekayəsi deyil. Bu yolun hər addımında döyüş, mübarizə, fədakarlıq və Vətənə sədaqət dayanır. O, qorxunu öz iradəsinə təslim etdirən, ölümün gözünə dik baxan qəhrəmanlardan biridir. Çünki həqiqətən də “Cəsarətsiz xoşbəxtlik, mübarizəsiz qələbə yoxdur...”
Azərbaycan xalqı hər zaman qəhrəman oğulları ilə fəxr edib. Qarabağ savaşında, xüsusilə 44 günlük Vətən müharibəsində yazılan zəfər tarixinin arxasında minlərlə igid Azərbaycan əsgərinin qanı, canı və şücaəti dayanırdı. Həmin qəhrəmanlardan biri də XTQ döyüşçüsü Zaur Ələkbərov idi. O, yalnız silah tutan bir hərbçi deyildi. O, Vətən sevgisini ürəyində daşıyan, döyüşü həyat amalına çevirən bir xüsusi təyinatlı idi.

26 avqust 1981-ci ildə Masallı rayonunun Qızılağac kəndində dünyaya göz açan Zaur Ələkbərov hələ gənc yaşlarından mərdliyi və iradəsi ilə seçilib. Sadə kənd həyatının zəhməti onu erkən yaşlardan möhkəmləndirmişdi. O, yaxşı anlayırdı ki, torpaq yalnız onu sevənlərin deyil, onu qoruyanların Vətəni olur. Elə buna görə də gənc yaşlarından özünü hərb sənətinə həsr etdi.
1999-cu ilin 24 oktyabrında həqiqi hərbi xidmətə başlayan Zaur Ələkbərov qısa müddətdə peşəkar hərbçi kimi seçilməyə başladı. Onun xidmət yolu yalnız ölkə daxilində deyil, beynəlxalq missiyalarda da davam etdi. Yuqoslaviyanın Kosovo vilayətində Sülhməramlı Qüvvələrin құрамında xidmət etməsi ona böyük təcrübə qazandırdı. Müharibənin ağrılarını, insan faciələrini və hərbi intizamın sərt qaydalarını yaxından görən Zaur daha da möhkəmləndi. Kosovo missiyası onun xarakterində dözümlülüyü, soyuqqanlılığı və peşəkarlığı daha da artırdı.
2003-cü ildə Təlim-Tədris Mərkəzinin gizirlər məktəbinə daxil olması onun həyatında yeni bir mərhələ açdı. Məktəbi uğurla başa vurduqdan sonra Azərbaycanın ən çətin və ən məsuliyyətli hərbi bölmələrindən biri olan XTQ kursuna daxil oldu. Bu kursa yüzlərlə insan qəbul olunsa da, yalnız ən güclülər sona qədər davam gətirə bilirdi. 450 nəfərdən sadəcə 21 nəfərin kursu bitirməsi XTQ hazırlığının necə ağır olduğunu göstərirdi. Zaur Ələkbərov həmin 21 nəfərdən biri idi. Bu, onun fiziki gücünün deyil, həm də dəmir iradəsinin göstəricisi idi.
XTQ-də xidmət etmək sadəcə peşə deyil, həyat fəlsəfəsidir. Burada qorxuya yer yoxdur. Burada geri çəkilmək anlayışı yoxdur. Burada yalnız irəli getmək, döyüşmək və qalib gəlmək var. Zaur Ələkbərov da məhz belə bir ruhun daşıyıcısı idi. O, illərlə müxtəlif xüsusi təlimlərdə iştirak edərək peşəkarlığını daha da artırdı. Dalğıc kursu, paraşüt hazırlığı, komando kursları, antiterror əməliyyatları üzrə təlimlər və yaşayış məntəqələrində döyüş hazırlığı onun döyüşçü xarakterini formalaşdırdı.

Pakistan İslam Respublikasının paytaxtı İslamabadda keçirilən Master Fitnes kursunda ikinci yeri tutması isə onun beynəlxalq səviyyədə hazırlıqlı hərbçi olduğunu təsdiqlədi. Bu uğur yalnız şəxsi nailiyyət deyildi. Bu, Azərbaycan hərbçisinin gücünün və peşəkarlığının xarici ölkələrdə də qəbul olunmasının göstəricisi idi.
Zaur Ələkbərovun həyatında idmanın da xüsusi yeri olub. O, uzun illər küçə döyüşü və özünümüdafiə idmanı ilə məşğul olub. Bu döyüş sənəti ona yalnız fiziki güc vermədi, həm də döyüş psixologiyasını öyrətdi. İnsan bəzən silahla deyil, iradə ilə qalib gəlir. Zaur da məhz belə insanlardan idi. Onun qazandığı qara kəmərlər, beynəlxalq yarışlardakı qələbələri və döyüş idmanındakı nailiyyətləri təsadüfi deyildi. O, hər zaman özünü daha güclü etməyə çalışan bir döyüşçü idi.
2016-cı ilin Aprel döyüşləri Azərbaycan Ordusunun gücünü bütün dünyaya göstərən şanlı səhifələrdən biri oldu. Həmin döyüşlərdə XTQ döyüşçüləri xüsusi qəhrəmanlıq nümayiş etdirdilər. Zaur Ələkbərov da həmin igidlər sırasında idi. O, ölümün üzərinə gedən, Vətən uğrunda canını ortaya qoyan xüsusi təyinatlılardan biri idi.
Lakin onun həyatının ən böyük sınağı 2020-ci ilin 44 günlük Vətən müharibəsi oldu. Azərbaycan xalqı həmin günlərdə təkcə torpaqlarını deyil, milli qürurunu da geri qaytarırdı. Füzulidən başlayan zəfər yolu Cəbrayıl, Hadrut, Laçın və Daşaltı istiqamətlərindən keçərək Şuşaya qədər uzanırdı. Bu yolun hər qarışında qəhrəmanlıq vardı. Hər addımda ölüm vardı. Amma Azərbaycan əsgəri qorxmurdu. Çünki onların qarşısında yalnız bir amal dayanırdı – Qarabağı azad etmək.
XTQ döyüşçülərinin Şuşa əməliyyatı isə müharibənin ən böyük qəhrəmanlıq səhifələrindən biri oldu. Sıldırım qayalar, ağır hava şəraiti və düşmənin güclü müdafiə xətti Azərbaycan əsgərini dayandıra bilmədi. Zaur Ələkbərov da həmin döyüşlərdə ön sıralarda idi. O, silahdaşları ilə birlikdə ölümün içinə girərək Şuşa uğrunda savaşdı.
Noyabrın 9-dan 10-na keçən gecə düşmənin artilleriya mərmisi nəticəsində yaralanmasına baxmayaraq, döyüş mövqeyini tərk etmədi. Bu, adi insan iradəsi deyildi. Bu, Vətən sevgisinin yaratdığı güc idi. Yaralı halda son ana qədər döyüşməsi onun necə böyük ruh sahibi olduğunu göstərirdi. Çünki həqiqi qəhrəmanlar yalnız qalib gələndə deyil, ən çətin anlarda da ayaqda qalmağı bacaran insanlardır.
2021-ci ildə Xocavənd istiqamətində həyata keçirilən əməliyyat bir daha XTQ döyüşçülərinin gücünü sübut etdi. Dörd gün qar, yağış və şaxta altında fasiləsiz hərəkət edən xüsusi təyinatlılar düşmənin diversiya qrupunu əsir götürdülər. Bu əməliyyat xüsusi peşəkarlıq və böyük fiziki hazırlıq tələb edirdi. Zaur Ələkbərov həmin əməliyyatda da öz cəsarəti ilə seçildi.
2022-ci ildə Kəlbəcər istiqamətində keçirilən “Sarsıdıcı zərbə” əməliyyatı isə onun döyüş yolunun ən ağır səhifələrindən biri oldu. Günlərlə davam edən ağır döyüşlərdə düşmənin çoxsaylı postları və texnikaları məhv edildi. Daha sonra sərhədlərin bərpası uğrunda aparılan döyüşlərdə Zaur və onun silahdaşları 60 gün ərzində düşmənlə üz-üzə mövqelərdə savaşdılar. Bu, sadəcə hərbi əməliyyat deyildi. Bu, iradələrin savaşı idi.
Düşmənin xüsusi təyinatlıları ilə əlbəyaxa döyüşə girmək hər hərbçinin bacara biləcəyi iş deyil. Bu, yalnız ölümə meydan oxuyan insanların edə biləcəyi qəhrəmanlıqdır. Zaur Ələkbərov və onun silahdaşları düşmənin qrup komandirini zərərsizləşdirərək Azərbaycan XTQ-sinin gücünü bir daha nümayiş etdirdilər.
21 il 6 ay XTQ sıralarında xidmət edən Zaur Ələkbərov 2024-cü ilin noyabr ayında ehtiyata buraxıldı. Lakin belə insanlar heç vaxt xidmətini bitirmir. Çünki onların həyatı Vətənə xidmət üzərində qurulub. Onlar uniformanı çıxarsalar belə, ruhən hər zaman döyüşçü olaraq qalırlar.
Bu gün Zaur Ələkbərovun adı Azərbaycanın qəhrəman oğulları sırasında qürurla çəkilir. O, yalnız bir hərbçi deyil, bir məktəbdir. Onun həyatı gənclərə örnəkdir. Çünki o, sübut etdi ki, insanın ən böyük gücü onun silahında deyil, ürəyindəki Vətən sevgisindədir.
Belə qəhrəmanlar xalqın yaddaşında heç vaxt unudulmur. Onların keçdiyi yol gələcək nəsillərə örnək olur. Zaur Ələkbərovun həyat yolu da məhz belə bir qəhrəmanlıq dastanıdır – qorxunu təslim edənlərin, ölümə meydan oxuyanların və Vətən uğrunda son nəfəsinə qədər savaşanların dastanı.

Zəruri giriş: Ələkbərov Zaur Zakir oğlu 26.08.1981-ci ildə Masallı rayonu Qızılağac kəndində anadan olub. 24.10.1999-cu ildə həqiqi hərbi xidmətə başlayıb, hərbi xidmətini Sülhməramlı Qüvvələrin tərkibində Yuqoslaviya şəhəri, Kosovo vilayətində davam etdirib.
2003-cü il yanvar ayının 1-də Təlim-Tədris Mərkəzinin gizirlər məktəbinə qəbul olub. Həmin məktəbi 2003-cü ilin avqustun 1-də bitirmişdir.
Xidmətini davam etdirmək üçün 052 nömrəli XTQ-nin kursuna daxil olub. Kursa 450 nəfərlə başlayıb, 21 nəfərlə bitirmişdir. Kursa daxil olmaqla, 2003-cü ilin sentyabr ayından etibarən XTQ-də xidmətinə başlamışdır. 21 il 6 ay XTQ-də xidmət edib. 2024-cü il noyabr ayının 21-də ehtiyata buraxılıb.
Xidməti dövründə bir çox təlimlərdə və kurslarda iştirak edib: dalğıc kursu, paraşüt kursu, komando kursu, yaşayış məntəqələrində döyüş kursu, antiterror kursu, qoruma kursu, POH kursu (Polis Özəl Hərəkət kursu).
Həmçinin Pakistan İslam Respublikasının paytaxtı İslamabad şəhərində keçirilən Master Fitnes kursunu 2-ci yerlə bitirmişdir.
18 il sərbəst küçə döyüşü və özünü müdafiə idmanı ilə məşğul olmuşdur və 2014-cü il noyabrın 24-də seminar yarışlarına qatılaraq direktor Yunusov Sahib və prezident Rasim Eyvazov tərəfindən layiq görülərək 1-ci dan qara kəmər sahibi olub.
09.18.2018-ci ildə INTERNATIONAL MARTIAL ARTS FESTIVAL-da iştirak edərək prezident Yunusov Sahib tərəfindən diplom alaraq 1-ci yerə layiq görülmüşdür.
01 avqust 2018-ci ildə Azərbaycanda keçirilən INTERNATIONAL PROFESSIONAL TOURNAMENT MMA və K-1 döyüşlərinə qatılaraq 1-ci yerə layiq görülüb.
2019-cu ilin yanvar ayının 26-27-də Azərbaycanda keçirilən 20 Yanvar şəhidlərinin əziz xatirəsinə həsr olunmuş, Avrasiya çempionatına qatılaraq prezident Yunusov Sahib tərəfindən 1-ci yerə layiq görülmüdür.
01.03.2019-cu ildə seminar yarışına qatılaraq prezident Yunusov Sahib tərəfindən 2-ci dan qara kəmərə layiq görülüb.
2012-ci ildə döyüş tapşırıqlarına başlayaraq 11 döyüş tapşırığında iştirak edib. 2016-cı ildə aprel döyüşlərinin iştirakçısı olub.
2020-ci il 44 günlük Vətən müharibəsində iştirak edib. Döyüşü Füzuli istiqamətində başlayaraq Cəbrayıl, Laçın, Hadrut, Daşaltı və ən sonda Şuşa daxilində davam etmişdir. Şuşanın müdafiəsi uğrunda noyabr ayının 9-dan 10-na keçən gecə düşmənin atdığı artilleriya mərmisi nəticəsində yaralanmışdır. Lakin yaralanmağına baxmayaraq son günə qədər döyüşçü yoldaşları ilə birlikdə müdafiəni saxlamışdır.
Şuşada döyüşən döyüşçülərin hər birinin adı ən yüksək medal və ordenlərə göndərilmişdi.
2021-ci ilin fevral ayında Xocavənd istiqamətində 4 gün gecə-gündüz yağış və qar şəraitində hərəkət edərək düşmənin 62 nəfərlik kəşfiyyat-diversiya qrupunu əsir götürüblər.
2022-ci ildə Kəlbəcər istiqamətində keçirilən 4 günlük “Sarsıdıcı zərbə” döyüşündə iştirak edərək N saylı hərbi hissəyə ezam olunmuşdur. Döyüş zamanı düşmənin 20-dən çox postunu və texnikasını məhv ediblər.
Həmin il sərhədlərin bərpası üçün Kəlbəcər istiqamətinə qrup ilə göndərilib və 60 gün ərzində düşmənlə burun-buruna döyüşərək onları geri çəkilməyə məcbur ediblər. Bu döyüşdə düşmənin XTQ-ləri ilə əlbəyaxa döyüşə girərək onların qrup komandirini zərərsizləşdirmişlər.

PS: Cəsarətsiz xoşbəxtlik, mübarizəsiz qələbə yoxdur...

Hürü Hacızadə
Yazıçı-publisist
“Qızıl qələm” mükafatçısı

Fərid Faiqoğlu
AJB-nin üzvü