Pərvanə Vəliyeva Azərbaycan Dövlət Neft və Sənaye Universitetinin nəzdində fəaliyyət göstərən Bakı Neft-Energetika Kollecinin tədris binasında kollecin müəllim və tələbə heyəti ilə görüş keçirib. Səmimi və qarşılıqlı müzakirələr şəraitində baş tutan görüşdə gəncləri maraqlandıran bir sıra mühüm məsələlər ətrafında fikir mübadiləsi aparılıb.
Görüş zamanı millət vəkili ölkədə həyata keçirilən dövlət gənclər siyasəti, Azərbaycanın beynəlxalq münasibətlər sistemi daxilində tutduğu mövqe, milli maraqların qorunması istiqamətində aparılan uğurlu xarici siyasət kursu və qanunverici orqanın fəaliyyəti barədə ətraflı məlumat verib.
Tələbələr müxtəlif mövzular üzrə deputata ünvanladıqları sualları səsləndiriblər. Xüsusilə Azərbaycanın xarici siyasəti, gənclərin cəmiyyət həyatında rolu, parlamentin fəaliyyəti və qanunvericilik təşəbbüsləri ilə bağlı məsələlər tələbələrin böyük marağına səbəb olub. Millət vəkili Pərvanə Vəliyeva bütün sualları ətraflı cavablandıraraq gənclərlə açıq və faydalı dialoq aparıb.
Deputat çıxışı zamanı gənclərin bilikli, vətənpərvər və müasir dünyagörüşlü yetişməsinin dövlətimizin gələcəyi baxımından mühüm əhəmiyyət daşıdığını vurğulayıb. O bildirib ki, bu cür maarifləndirici görüşlər gənclərin ictimai-siyasi proseslər barədə daha dolğun məlumat əldə etməsinə və onların fəal vətəndaş kimi formalaşmasına mühüm töhfə verir.
Sonda Pərvanə Vəliyeva belə görüşlərin mütəmadi keçirilməsinin vacibliyini qeyd edib, tədbirin təşkilinə yaradılan şəraitə görə kollecin direktoru, dosent Ata Babayevə və kollecin kollektivinə təşəkkürünü bildirib.